F’Malta l-istuffat huwa popolari mhux ħażin – tal-laħam, braġjoli, qarnit, eċċ. Dan l-istuffat huwa kemxejn differenti għax mas-siċċ hemm iz-zalzett Spanjol chorizo u ċ-ċiċri.
Ħin: siegħa u 35 minuta
Isservi: 4 persuni
Ingredjenti:
- 600 g siċċ, imnaddaf u mqatta’ f’biċċiet ta’ 2.5 ċm
- 2 basliet, maqsumin min-nofs u mqattgħin għat-tul
- 6 sinniet tewm, imqattgħin
- 8 tadamiet misjurin, imqaxxrin, imnaddfin u mqattgħin
- Bott ċiċri (400 g), imsaffin u mlaħalħin
- 200 ml inbid abjad
- 2 werqiet tar-rand
- Kuċċarina paprika
- ½ kuċċarina żagħfran tal-Indja (turmeric)
- Bżar mitħun frisk
- 2 mgħaref żejt taż-żebbuġa
- 200g zalzett chorizo, imqatta’ roti ħoxnin
- Mgħarfa nagħniegħ frisk, imqatta’
- Mgħarfa tursin frisk, imqatta’
Tħejjija:
- F’taġen kbir u fond jew kazzola ċatta saħħan iż-żejt taż-żebbuġa fuq nar moderat u żid is-siċċ. Aqlih għal 3 minuti u poġġih fi platt għas-sħana.
- Fl-istess taġen qalli l-flieli tal-basal għal 3 minuti, żid it-tewm u kompli qalli għal 2 minuti oħra.
- Żid l-inbid u t-tadam u, meta jiftħu jagħlu, baxxi n-nar u tektek għal 10 minuti sakemm jinħall it-tadam.
- Poġġi s-siċċ fiz-zalza u żid iż-żagħfran tal-Indja, il-paprika, il-weraq tar-rand u ċ-ċiċri.
- Meta t-taħlita tiftaħ tagħli, baxxi n-nar u tektek għal 20 minuta mgħotti.
- Żid iz-zalzett chorizo, in-nagħniegħ, it-tursin u l-bżar u kompli tektek għal 15-il minuta oħra mgħotti parzjalment. Jekk tara li l-istuffat qed jixxotta żidu ftit ilma.
- Servi l-istuffat ma’ ħobż frisk.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
