Meta nsemmu strudel naħsbu fit-tuffieħ. L-istrudel oriġinali hija magħmula bit-tuffieħ, imma f’din ir-riċetta se nużaw frott aktar sajfi, il-ħawħ, u li jaqdina tajjeb daqs it-tuffieħ.
Ħin: 50 minuta
Isservi: 6 persuni
Ingredjenti:
- 4 ħawħiet sofor (madwar 700 g)
- Bajda imħabbta ma’ mgħarfa ilma
- 250 g għaġina sfiljurata
- 75 g zokkor ismar
- Mgħarfa dqiq
- 75 g ġewż pekan (pecan nuts), imqatta’
- ½ kuċċarina essenza tal-vanilla
- 2 mgħaref zokkor
Tħejjija:
- Qaxxar u neħħi l-għadma tal-ħawħ u qattgħu flieli. Ħallih joqtor f’passatur.
- Saħħan il-forn għal temperatura ta’ 200°C. idlek tilar bil-butir.
- Iftaħ l-għaġina f’rettangolu ta’ 30 ċm x 35 ċm.
- Fi skutella ħallat id-dqiq u z-zokkor ismar, imbagħad żid l-essenza tal-vanilla, il-ġewż pekan u l-ħawħ imqatta’, u ħallat kollox.
- Poġġi t-taħlita tal-ħawħ fi strixxa tul in-nofs tal-għaġina. Agħmel qatgħat tul iż-żewġ ġnub tal-għaġina ta’ madwar 2 ċm wisa’. Ħalli spazju ta’2 ċm minn mal-mili. Itwi l-istrixxi għal fuq il-ħawħ wieħed kontra l-ieħor biex tiffoma malju. Idlek il-wiċċ bil-bajda mħabbta u roxx biz-zokkor.
- Poġġi l-istrudel fuq it-tilar u Aħmi għal 25 minuta jew sakemm l-għaġina tieħu kulur dehbi.
Nota: biex tittrasferi l-istrudel għal fuq it-tilar tista’ tiftaħ l-għaġina u tgħaqqad l-istrudel fuq biċċa kartaforn kbira u ttellagħha bil-karta b’kollox għal fuq it-tilar.
Ippruvajtha din ir-ricetta ta' strudel tal-ħawħ u ġewż pekan? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
