Stollen huwa kejk Ġermaniż tradizzjonali li normalment jittiekel fi żmien il-Milied. Huwa mtella’ bil-ħmira u magħmul minn frott imnixxef, lewż u ħwawar, u mimli bil-pastarjali.
Ingredjenti
Għal 6-8 porzjonijiet
- 200g butir mingħajr melħ
- 250ml ħalib
- 20g ħmira niexfa
- 500g dqiq
- 100g zokkor fin (caster sugar)
- Niskata noċemuskata mitħuna
- Niskata msiemer tal-qronfol mitħunin
- ½ kuċċarina essenza tal-vanilla
- 2 qatriet essenza tal-lewż
- 55g lewż mingħajr qoxra, imqatta’
- 200g żbib
- 100g passolina
- Qoxra maħkuka ta’ larinġa
- Qoxra maħkuka ta’ lumija
- 225g pastarjali
Biex isservi:
- 25g butir, imdewweb
- 2 mgħaref zokkor tal-ġelu (icing sugar)
Metodu
- Dewweb il-butir fuq nar bati u ħallih jibred.
- Saħħan il-ħalib u żid miegħu l-ħmira.
- F’bieqja kbira ħallat id-dqiq, iz-zokkor, in-noċemuskata, l-imsiemer tal-qronfol, l-essenza tal-vanilla u l-essenza tal-lewż. Żid u ħawwad il-butir maħlul u l-ħalib bil-ħmira. Tella’ t-taħlita u agħġen sakemm tiġi lixxa u tiġġebbed.
- Daħħal fl-għaġina, billi tagħġinhom magħha, il-lewż, il-qxur taċ-ċitru u l-frott imnixxef. Agħġen sakemm dawn jitħalltu sew. Erġa’ poġġi l-għaġina fil-bieqja u għattiha bil-cling film. Ħalliha f’post għas-sħana għal bejn siegħa u sagħtejn, jew sakemm tirdoppja fid-daqs.
- Erġa’ agħġen l-għaġina, roxx bid-dqiq il-wiċċ li qed taħdem fuqu, u iftaħha f’forma ta’ rettangolu.
- Iftaħ il-pastarjali f’qies ftit iżgħar mill-għaġina u poġġiha fuq l-għaġina. Gerbeb it-tnejn flimkien u poġġiha fuq tilar miksi bil-kartaforn. Ħalliha togħla għal siegħa.
- Saħħan il-forn għal temperatura ta’ 190°C. Aħmi għal siegħa.
- Idlikha bil-butir maħlul u roxx biz-zokor tal-ġelu. Servi sħuna jew kiesħa.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.
