Riċetta: Sorbet tal-lumi u mascarpone bil-frott

Lemon sorbet and mascarpone with fruit: Sorbè tal-lumi u mascarpone bil-frott

Meta t-temperatura tibda togħla xi ftit nibdew inwarrbu d-deżerti tqal u nduru aktar għal deżerti ħfief u friski. Dan is-sorbet huwa adattat ħafna għal wara ikla xi ftit tqila għax huwa ħafif u rifreskanti.

Ħin: 6 sigħat u 30 minuta

Isservi 4 persuni

Ingredjenti:

  • 2 lumijiet
  • 250 g zokkor fin (caster sugar)
  • 500 g mascarpone

Għaz-zalza tal-frott:

  • 300 g frott frisk bħal frawli, blueberries jew raspberries, imnaddaf
  • 200 g zokkor fin (caster sugar)
  • 400 ml ilma

Tħejjija:

  1. Biex tagħmel is-sorbet:
    1. Qaxxar il-lumi, il-qoxra safra ta’ barra biss mingħajr l-abjad.
    2. Agħsar il-lumi.
    3. Ħallat iz-zokkor ma’ 450 ml ilma ġo kazzola u poġġihom fuq nar baxx.
    4. Ħawwad sakemm jinħall iz-zokkor u żid il-meraq u l-qxur tal-lumi.
    5. Għolli n-nar u, kif it-taħlita tibda tagħli, erġa’ baxxih u tektek għal 3 minuti.
    6. Ħalli t-taħlita tiksaħ, għaddiha minn passatur u armi l-qxur.
    7. Poġġi l-mascarpone fi skutella u ftit ftit ħabbat miegħu ix-xropp tal-lumi.
    8. (Hawn tista’ tkompli tagħmel is-sorbet billi tpoġġih f’magna tal-ġelat u timxi skont l-istruzzjonijiet tagħha.)
    9. Poġġi t-taħlita f’kontenitur baxx u ffriżaha għal 2-3 sigħat jew sakemm tkun nofsha ffriżata.
    10. Aqleb it-taħlita fi proċessur tal-ikel u kissirha.
    11. Erġa’ poġġiha fil-kontenitur u ffriżaha parzjalment għat-tieni darba.
    12. Erġa’ kisser it-taħlita fil-proċessur tal-ikel u poġġiha fil-kontenitur.
    13. Iffriża t-taħlita kompletament.
  2. Biex tagħmel iz-zalza tal-frott:
    1. Poġġi l-ilma u z-zokkor f’kazzola fuq nar baxx sakemm jinħall iz-zokkor.
    2. Għolli n-nar sakemm it-taħlita tiftaħ tagħli mingħajr ma tħawwadha.
    3. Għalliha mikxufa għal 10 minuti jew sakemm ix-xropp jibda jagħqad ftit.
    4. Baxxi n-nar u żid il-frott (jekk se tuża l-frawli, aqsmu min-nofs jew f’erba’, skont id-daqs tiegħu).
    5. Sajjar għal 3 minuti sakemm il-frott jirtab ftit.
  3. Servi s-sorbet biz-zalza tal-frott.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!