Din ir-riċetta tas-soppa għandha l-pastard bħala l-bażi tagħha, li meta titħnu jagħmilha kremuża biżżejjed u ma jkollokx bżonn iżżid ħaxix ieħor bħal patata biex tgħaqqadha aktar. Iċ-cheddar jagħti t-togħma ewlenija peress li t-togħma tal-pastard hija ftit dgħajfa. Biex tagħmilha aktar attraenti tista’ żżid ponn ġewż imfarrak, tursin imqatta’ jew qxur tal-lumi maħkuk fin, li kollha jagħtu palat bnin lil din is-soppa.
Ħin: 50 minuta
Isservi: 6 persuni
Ingredjenti:
- 600 g pastard, miftuħ fjuri
- 2 mgħaref butir
- Basla, imqattgħa
- 2 sinniet tewm, imqattgħin
- 2 mgħaref dqiq
- Niskata noċemuskata (nutmeg), maħkuka friska
- Niskata bżar cayenne
- 2 kikkri stokk tat-tiġieġ jew tal-ħaxix
- ½ kikkra krema doppja
- 3 friegħi sagħtar frisk
- 300 g ġobon cheddar, maħkuk
- Bżar mitħun frisk
Tħejjija:
- Għalli l-pastard f’kazzola bl-ilma bil-melħ għal madwar 4 minuti, saffi u ħalliha tibred.
- Żomm ftit mill-fjuri tal-pastard, aqtgħalhom iz-zokk , iftaħhom fi fjuri iżgħar u erfagħhom għal aktar tard. Iz-zkuk poġġihom mal-kumplament tal-pastard.
- Dewweb il-butir f’kazzola fuq nar baxx. Żid il-basla u qalli għal madwar 10 minuti, sakemm il-basla tirtab. Żid it-tewm u kompli qalli għal 3 minuti oħra.
- Għolli n-nar għal moderat u żid id-dqiq, in-noċamuskata u l-bżar cayenne, u ħawwad għal 3 minuti. Ferra’ l-istokk, il-krema u 2 kikkri ilma. Żid ukoll is-sagħtar.
- Meta s-soppa tiftaħ tagħli baxxi n-nar, żid il-ġobon cheddar u ħawwad sakemm jinħall, imbagħad ħalliha ttektek għal 5 minuti
- Tella’ l-friegħi tas-sagħtar mis-soppa u armihom.
- Żid il-biċċiet il-kbar u z-zkuk tal-pastard, u bżar mitħun frisk (jekk ikun hemm bżonn tista’ titfa’ ftit melħ ukoll) u ħawwad.
- Itħan is-soppa u żid il-fjuri tal-pastard żgħar. Erġa’ saħħan is-soppa bil-mod.
- Servi s-soppa sħuna fil-platti fondi. Żejjen bil-ġewż imfarrak, tursin imqatta’ jew qxur tal-lumi maħkuk.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
