Din is-soppa hija l-aktar waħda favorita mat-tfal tiegħi. Meta kienu iżgħar fl-età kont naħseb li dan kien minħabba l-kulur vivaċi li għandha, imma llum kibru u xorta għadha l-favorita tagħhom. Għal dawn iż-żminijiet tas-sena hija ideali għax il-vitamina Ċ li fihom il-karrotti u l-larinġ tikkumbatti l-irjiħat.

Ingredjenti

Għal 6 persuni

• 1 mgħarfa żejt tal-ward tax-xemx
• 4 karrottiet imdaqqsin, imqaxxrin u mqattgħin dadi
• 2 basliet, imqaxxrin u mqattgħin
• 2 patatiet, imqaxxrin u mqattgħin dadi
• 2 sinniet tewm, imqattgħin
• 1 mgħarfa kunserva
• 2 mgħaref għads aħmar, imnaddaf u mlaħlaħ
• 1 litru stokk tal-ħaxix
• Meraq ta’ 2 larinġiet
• Melħ u bżar mitħun frisk
• 2 mgħaref tursin frisk

Metodu

1. F’kazzola jew borma kbira saħħan iż-żejt u itfa’ l-karrotti u l-basal u qalli għal 5 minuti. Żid il-patata u t-tewm u kompli sajjar għal 5 minuti oħra.
2. Żid il-kunserva u l-għads, u melħ u bżar. Ħawwad u ferra’ l-istokk.
3. Għolli n-nar u meta tiftaħ tagħli erġa’ baxxih, għatti l-borma u tektek għal 20 minuta.
4. Neħħi minn fuq in-nar u żid il-meraq tal-larinġ u t-tursin. Itħan bi blender sakemm ikollok taħlita lixxa u erġa saħħan is-soppa.
5. Servi sħuna ma’ ħbejżiet somor.

Ippruvajt din ir-riċetta?  Kif sibtha? Għidilna billi tħalli kumment jew ir-rating hawn taħt u agħfas share.