Il-Jerusalem artichokes m’għandhom xejn x’jaqsmu ma’ Ġerusalemm. Ħadd mhu ċert minn fejn oriġina eżatt dan l-isem, imma ħafna jgħidu li huwa korruzzjoni tal-kelma Taljana ‘girasole’. Il-pjanta tiegħu tixbah ħafna lil dik tal-ward tax-xemx u għalhekk l-emigranti Taljani fl-Amerika kienu jsejħulu girasole – il-kelma li x’aktrax giet mgħawġa u mibdula f’‘ġerusalem’. Imbagħad it-togħma tiegħu tixbah ukoll lil tal-articiocco – il-qaqoċċ. Flimkien, il-girasole articiocco sar il-Jerusalem artichoke.
Ħin: 50 minuta
Isservi: 4 persuni
Ingredjenti:
- żejt taż-żebuġa
- 1 basla, imqattgħa rqiq
- 700g Jerusalem artichokes, imqaxxrin u mqattgħin
- 1 patata, maqsuma f’erbgħa
- 1lt ilma
- 1 werqa tar-rand
- 4 friegħi sagħtar (thyme)
- 150ml krema singla
- Melħ u bżar mitħun frisk
Metodu:
- Saħħan 2 mgħaref żejt taż-żebbuġa f’kazzola kbira fuq nar moderat. Żid il-basla u qalli sakemm issir trasparenti. Żid l-artichokes u l-patata u ħawwad.
- Żid l-ilma, il-werqa tar-rand u 3 friegħi sagħtar u ħawwad. Meta tibda tagħli baxxi n-nar u tektek sakemm l-artichokes u l-patata jirtabu sew.
- Tella’ l-werqa tar-rand u s-sagħtar mill-kazzola. Itħan is-soppa sakemm issir lixxa.
- Għaddi s-soppa minn passatur u erġa’ saħħanha sakemm tagħli. Baxxi n-nar u żid il-krema, melħ u bżar mitħun frisk.
- Servi fi bwieqi u żejjen b’aktar żejt taż-żebbuġa u weraq tas-sagħtar.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.