Riċetta: Soppa tal-ħaruf bl-għaġin bebbux

Lamb soup with pasta shells : Soppa tal-ħaruf bl-għaġin bebbux

Read this recipe in English: Lamb soup with pasta

Din is-soppa mhux tas-soltu, bix-xikel tal-ħaruf, tieħu l-ħin biex tippreparaha, iżda b’dan is-sajran bil-mod imma fit-tul il-laħam tal-ħaruf jiġi verament tari u litteralment jaqa’ minn fuq l-għadma. Għalhekk, tnaqqasx il-ħin għax ir-riżultat ma jkunx l-istess.

Ħin: sagħtejn

Isservi: 4 persuni

Ingredjenti:

  • 1 kuċċarina żejt veġetali
  • 2 ixkla (shanks) tal-ħaruf
  • 1 basla, imqattgħa rqiq
  • 2 karrotti, imqattgħin
  • 2 iżkuk tal-karfus, imqattgħin
  • 2 sinniet tewm, misħuqin
  • 400 g polpa tat-tadam
  • 1 litru stokk taċ-ċanga jew ħaruf
  • 100 g għaġin bebbux imdaqqas
  • Ponn weraq tal-ħabaq jew salvja (sage), imqatta’ rqiq
  • Melħ u bżar mitħun frisk
  • 4 ħbejżiet somor (wholemeal), biex isservi

Tħejjija:

  1. Saħħan iż-żejt f’kazzola kbira fuq nar moderat għal għoli.
  2. Żid l-ixkla tal-ħaruf u xawwathom dawramejt. Tellagħhom u poġġihom fuq platt.
  3. Baxxi n-nar għal moderat u żid il-basla, il-karrotti, u l-karfus. Ħawwad għal madwar 3 minuti jew sakemm jibdew jirtabu.
  4. Żid it-tewm u kompli sajjar għal minuta oħra.
  5. Erġa’ għolli ftit in-nar u rritorna l-ħaruf fil-kazzola. Żid it-tadam, l-istokk u 500 ml ilma.
  6. Meta s-soppa tibda tagħli baxxi n-nar, għatti l-kazzola u tektek għal siegħa u nofs.
  7. Tella’ l-ixkla mis-soppa, neħħilhom il-laħam minn fuq l-għadma u qattgħu.
  8. Sadanittant erġa’ għalli s-soppa u żid l-għaġin bebbux. Għatti l-kazzola u sajjar għal 7-8 minuti jew sakemm isir l-għaġin.
  9. Żid il-laħam tal-ħaruf u l-ħabaq jew salvja, u roxx bil-melħ u l-bżar.
  10. Servi s-soppa mal-ħobż frisk.

Ippruvajt din ir-riċetta?  Kif sibtha? Għidilna billi tħalli kumment jew ir-rating hawn taħt u agħfas share.