F'din is-soppa nuża ż-żagħfran tal-Indja (turmeric), li għandu benefiċċji anti-fjammatorji u huwa antiossidant b'benefiċċi diversi kemm għas-saħħa u kif ukoll għat-tisjir.
Jintuza wkoll bħala ingredjent f'foundations tal-make-up bħala stimulant għal ġilda luminuża, u huwa użat ukoll fis-sapun u fix-shampoos kontra l-brija. Fl-Indja huwa użat fl-arti tal-Mehndi (jew, kif inhu wkoll magħruf, il-Henna) biex joħolqu tattoos temporanji bil-Henna. Fl-omeopatija, jew mediċina alternattiva, iż-żagħfran tal-Indja huwa użat fit-trattament ta' tfekkik kif ukoll biex jikkura mard fl-istonku.
Ingredjenti
- Mgħarfa żejt taż-żebbuġa
- 1 basla mdaqqsa, mqatta' biċċiet
- 2 sinniet tewm
- mgħarfa ħwawar imħallat inixxef (mixed herbs)
- 2 kuċċarini żagħfran tal-Indja
- 2 weraq tar-rand
- 200g favetta
- zunnarija mdaqqsa
- patata mdaqqsa
- 2 kikkri stokk
- 3 kikkri ilma
- bżar
- melħ jekk trid, minħabba li hemm l-imluħa miz-zalzett tal-Malti
Għal wiċċ is-soppa
- zalzett tal-Malti; iftħu u sajjar il-mili f'taġen bla żejt
- tursin
Metodu
Aħsel il-favetta u għaddasha ġo l-ilma. Ħalliha l-lejl biex tirtab.
Filgħodu għaddi l-favetta minn ġo passatur biex tneħħi l-ilma.
Saħħan iż-żejt ġo borma. Aqli l-basla u t-tewn ħafif ħafif. Żid iż-żagħfran tal-Indja, ħawwad, imbagħad żid il-favetta. Żid l-istokk u l-ilma u l werqa tar-randa. Għalli għal nofs siegħa. Żid il-hxejjex u sajjarhom. Tħallix il borma tinxef mil-likwidu u żid aktar ilma jekk jkun hemm bżonn.
Meta jsir il-ħaxix, itfi n-nar u ħalli kollox jibred ftit qabel ma tidħnu.
Meta tiġi biex isservi s-soppa, saħħanha, u fil-wiċċ ferrex il-biċċiet taz-zalzett tal-Malti. Żejjen bit-tursin.
