Read this in English: Recipe: Meatball soup
Riċetta ħafifa għall-ġranet kesħin tax-xitwa. Riċetta li, għalkemm tissejjaħ soppa, hija ikla kompluta għax fiha laħam, ħaxix u għaġin flimkien.
Isservi: 4 persuni
Ingredjenti:
- 500 g ikkapuljat taċ-ċanga
- 1 basla żgħira ħamra, imqattgħa rqiq
- 2 sinniet tewm, misħuqin
- ½ kikkra frak tal-ħobż frisk
- ⅓ kikkra weraq tal-ħabaq, imqatta’
- ⅓ kikkra ġobon Parmiġġan, maħkuk
- 1 bajda, imħabbta ħafif
- 600 g polpa tat-tadam
- 4 kikkri stokk tat-tiġieġ
- ½ kikkra għaġin forma ta’ xgħir
- 2 qarabagħliet, imqattgħin dadi
- 150 g fażola twila (green beans), imnaddfa u maqsuma fi tlieta
- ⅓ kikkra ġobon Parmiġġan, maħkuk
- Ħobż frisk bil-qoxra biex isservi
Tħejjija:
- Ħallat flimkien il-laħam, il-basla, it-tewm, il-frak tal-ħobż, il-Parmiġġan u l-bajda f’bieqja kbira. Roxx bil-bżar u l-melħ. Ifforma t-taħlita fi blalen żgħar u poġġihon fuq platt.
- Ferra’ l-polpa tat-tadam f’kazzola kbira u żid magħha l-istokk u 2 kikkri ilma. Poġġi fuq nar għoli sakemm tagħli. Iġbor xi ragħwa li titla’ fil-wiċċ u itfa’ l-blalen tal-laħam. Erġa’ poġġi fuq in-nar sakemm tiftaħ tagħli.
- Baxxi n-nar u tektek, mingħajr ma tgħatti l-kazzola, għal 10 minuti. Żid l-għaġin u tektek għal 5 minuti oħra. Żid il-qarabagħli u l-fażola u ħalli fuq in-nar għal 5-7 minuti jew sakemm tara li l-ħaxix sar.
- Aqleb is-soppa fi bwieqi fondi, roxx bil-Parmiġġan u servi ma’ ħobż frisk u jqarmeċ.
Għoġbitek din ir-riċetta? Għidilna billi tħalli l-kummenti tiegħek hawn taħt, u agħmel ir-rating tiegħek u share biex inkomplu nwasslulek aktar riċetti li jogħġbuk.
