Jekk tħobb il-frawli, meta jasal l-istaġun ixtri kemm tiflaħ il-friża! Aħslu, nixxfu u neħħilu z-zokk; poġġi l-frawli f'boroż tal-friża b'madwar 170 g ġo kull waħda, u hekk għandek porzjonijiet lesti biex tużahom kif tixtieq.

Pereżempju tista' tipprova dan l-ismoothie tal-frawli bl-anakardji (cashews), il-ħafur (oats) u l-ħalib tal-ġewża tal-Indi (coconut milk) li huwa sustanzjuż ħafna u jimliek sew bħala kolazzjon ta' filgħodu.

Isservi: porzjon wieħed ġeneruż

Ingredjenti: 

• 2 imgħaref ħafur
• 2-3 imgħaref misħun (kemm tgħatti l-ħafur)
• 170 g frawli ffriżat
• Kuċċarina żerriegħa taċ-chia (chia seeds) nexfin 
• 15-il g anakardji (ħallihom jixxarrbu matul il-lejl u warrab l-ilma) 
• 1/3 ta' kikkra ħalib tal-ġewża tal-Indi 
• 2/3 ta' kikkra meraq tal-larinġ
• kuċċarina u nofs ġulepp tar-rummien (pomegranate molasses) 

Nota: Jekk ma ssibx tixtri l-ġulepp tar-rummien, tista' tagħmlu inti billi tgħalli l-meraq tar-rummien pur 100% sakemm isir ġulepp. Żommu fil-friġġ u ħu minnu skont il-bżonn.

Tħejjija:

1. Ħawwad flimkien il-ħafur u l-misħun u ħallih għal madwar 15-il minuta sakemm il-ħafur jirtab. Tista' wkoll tħallih matul il-lejl f'ilma kiesaħ biex issibu lest filgħodu.
2. Poġġi l-ingredjenti kollha ġol-blender u ħawwad b'veloċità għolja għal minuta.
3. Servi immedjatament.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Ara lista ta' ħxejjex u frott skont l-istaġun