L-ewwel pubblikazzjoni li turi riċetti għall-cocktails kienet fl-1862 fi ktieb mill-professur Jerry Thomas li kien jismu How to Mix Drinks jew The Bon Vivant's Companion. Fost xorb ieħor taħt titli oħra, kien hemm għaxar riċetti għall-cocktails. Jidher li l-ingredjent prinċipali li kien jiddistingwi l-cocktails minn tipi ta' xorb ieħor kien l-użu ta' bitters bħala wieħed mill-ingredjenti. Iżda llum insibu li dan mhux dejjem minnu u r-riċetti tal-cocktails saru ħafna iktar kumplessi.
Però hawn taħt tista' ssib riċetta ferm sempliċi għall-cocktail li fih il-morr tat-triple sec u t-togħma ħelwa tal-coconut rum. Dan il-cocktail, bil-Prosecco bħala l-ingredjent prinċipali, żgur jagħti xaqliba differenti lill-ħruġ ħdejn il-baħar ta' filgħaxija mal-ħbieb, f'dawn il-ġranet tas-sajf.
Għal cocktail wieħed:
Ingredjenti:
- 120 ml Prosecco
- 30 ml coconut rum
- 15 ml triple sec
- Ġewża tal-Indi għat-tiżjin
Tħejjija:
- Iftaħ il-ġewża tal-Indi, neħħi ftit mil-laħam u aqta' tiżjin forma ta' stilla.
- Itfa' l-coconut rum u t-triple sec f'tazza, imbagħad żid il-Prosecco. Żejjen bl-istilla u servi.
