Dan il-platt eleganti ta’ ross bil-krema tal-kurrat u r-rummien għandu togħma kemxejn ħelwa. Ir-ross huwa msajjar fil-meraq tar-rummien stess u dan jagħmel din it-togħma mhux tas-soltu imma tant pjaċevoli.
Ingredjenti
Għal 4 persuni
• 400g ross arborio jew carnaroli (tar-risotto)
• 200g kurrat, imnaddaf u mqatta’
• 70g butir
• 2 mgħaref żejt taż-żebbuġa
• Stokk tal-ħaxix sħun, kemm ikollok bżonn
• 1 tazza nbid rosè
• 2 rumminiet
• Niskata melħ
• Bżar mitħun frisk
Fesdaq iż-żerriegħa tar-rummien filwaqt li toqgħod attenta li ma taqlax ukoll ir-rita s-safra. Warrab erba’ mgħaref miż-żerriegħa biex fl-aħħar iżżejjen ir-risotto. Agħsar iż-żerriegħa billi tgħaddiha minn passatur jew minn mitħna tal-ħaxix (passaverdure).
Saħħan 50g mill-butir u fih qalli l-kurrat. Jekk jibda jixxotta żidlu ftit stokk tal-ħaxix. Agħsru b’liqwidatur jew blender sakemm isir krema.
Sadanittant, saħħan iż-żejt f’taġen kbir jew borma ċatta u qalli fih ir-ross. Itfa’ miegħu l-inbid u ħallih sakemm jevapora, imbagħad żid miegħu il-krema tal-kurrat filwaqt li tħawwad kontinwament b’mgħarfa tal-injam. Nofs sajran żid il-meraq tar-rummien. Meta jkun hemm bżonn żid ftit ftit l-istokk tal-ħaxix sakemm ir-ross ikun sar sewwa. Fl-aħħar żid l-20g butir li jkun fadal, il-melħ u l-bżar. Żid ukoll żewġ imgħaref żerriegħa tar-rummien u ħawwad kollox sew. Uża ż-żewġ imgħaref l-oħra biex iżżejjen il-platt. Servi fil-pront.
