Read this recipe in English: Rice with lemon and broad beans
Platt ieħor li jista’ jkun adattat ukoll għal min hu veġetarjan, b’togħma bnina u friska tar-rebbiegħa.
Ħin: 45 minuta
Isservi: 4 persuni
Ingredjenti:
- Kurrata (leek), imqattgħa
- 2 sinniet tewm, imqattgħin
- Mgħarfa żejt taż-żebbuġa
- 300 g ross, arborio jew short grain
- 250 ml inbid abjad (dry)
- Litru stokk tal-ħaxix, sħun
- 2 kilo ful, imqaxxar miż-żewġ qoxriet (ikollok madwar 400 g)
- 2 imgħaref tursin frisk, imqatta’
- Mgħarfa nagħniegħ frisk, imqatta’
- Qoxra maħkuka ta’ lumija
- Meraq ta’ lumija
- Melħ u bżar mitħun frisk
- 100 g ġobon Parmiġġan, maħkuk (jekk trid)
Tħejjija:
- Saħħan iż-żejt f’taġen u qalli l-kurrata sakemm tirtab, imbagħad żid it-tewm u qalli għal 2 minuti oħra. Żid il-ful u r-ross u ħawwad, imbagħad ferra’ l-inbid u ħallih sakemm jinxtorob.
- Żid kuċċarun stokk u ħawwad sakemm jinxtorob ukoll; żid kuċċarun stokk ieħor u ibqa’ sejra hekk sakemm isir ir-ross, filwaqt li tħawwad kontinwament.
- Fl-aħħar ftit ħin żid il-meraq u l-qoxra tal-lumija, it-tursin u n-nagħniegħ, melħ u bżar kemm tiggosta, u l-ġobon Parmiġġan. Ħawwad kollox sew u servi fil-pront.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
