Ir-risotto huwa platt li tippreparah fi ftit ħin. Jekk ikollok ir-ross adattat tista’ tuża l-immaġinazzjoni tiegħek, tara x’ingredjenti għandek id-dar, u toħloq risotto ġdid kull darba, mingħajr ma ssegwi riċetta.
Ingredjenti
Għal 6 persuni
- 2 mgħaref butir
- 500g faqqiegħ (mushrooms) imħallat (oyster, shiitake, miċ-ċatt, eċċ.), imqatta’
- 40ml żejt taż-żebbuġa
- 2 sinniet tewm, misħuqin
- 1 kurrata, imqatta’
- 1lt stokk tat-tiġieġ sħun
- 2 kikkri ross arborio
- 120ml inbid abjad
- Qoxra maħkuka rqiq ta’ lumija
- 60g ġobon Parmiġġan
- 60g ġobon pecorino
- 2 mgħaref tursin, imqatta’ rqiq
- Saħħan il-butir f’taġen. Żid il-faqqiegħ u qalli għal 5 minuti. Neħħih minn fuq in-nar.
- Saħħan iż-żejt taż-żebbuġa f’kazzola bil-qigħ oħxon, żid il-kurrat u t-tewm u qalli għal 6 minuti.
- Żid ir-ross u ħawwad għal minuta sakemm jinkesa kollu biż-żejt. Żid l-inbid abjad u kompli sajjar sakemm jinxtorob l-inbid kollu. Ibda żid l-istokk tat-tiġieġ ftit ftit b’kuċċarun (l-istokk irid jinżamm f’temperatura għolja biex ma jbaxxix it-temperatura tar-ross meta żżid minnu). Filwaqt li tħawwad kontinwament, kompli żid l-istokk ftit ftit sakemm isir ir-ross. Dan il-proċess jieħu bejn wieħed u ieħor xi 20 minuta.
- Mar-ross żid il-faqqiegħ, il-qoxra maħkuka ta’ lumija, il-ġobnijiet u t-tursin. Ħallat kollox flimkien u servi fil-pront.
