Il-pesto f'din ir-riċetta jgħati togħma partikolari u tajba, barra li jżejjen ir-risotto bi ftit aħdar. Jekk tixtieq, tista' tuża fażola ħadra jew piżelli minflok, jew inkella tista' tipprova din ir-riċetta mingħajr ħaxix.
Ħin: 30 minuta
Isservi: 4-6 persuni
Ingredjenti:
- 7 kikkri stokk tat-tiġieġ jew tal-ħaxix
- 2 imgħaref żejt taż-żebbuġa Carapelli
- 1/2 kikkra basal imqatta'
- Melħ skont il-gosti
- Kikkra u nofs ross Arborio
- Sinna tewm, imqatta'
- 1/2 kikkra inbid abjad dry bħal pinot grigio jew sauvignon blanc
- 350g asparagu, mqatta' f'biċċiet ta' pulzier
- Madwar 1/4 kikkra pesto, skont il-gosti
- 2-4 imgħaref Parmeġġan, għat-togħma
Tħejjija:
- Poġġi ftit stokk ġo borma u ħallih itektek fuq nar baxx. Żomm kuċċarun ħdejn il-borma.
- Saħħan iż-żejt taż-żebbuġa fuq nar medju ġo taġen kbir.
- Żid il-basla u ftit melħ u sajjar għal madwar 3 minuti, sakemm jirtab imma ma jkunx smar.
- Żid ir-ross u t-tewm u ħawwad sakemm ir-ross jibda jfaqqa'.
- Żid l-inbid u ħawwad sakemm ma jibqax jidher fit-taġen.
- Ibda żid l-istokk bil-mod il-mod, daqs żewġ kuċċaruni. L-istokk għandu kemm kemm jiksi r-ross u jkun qiegħed ibaqbaq bilmod (imma mhux bilmod ħafna).
- Ħawwad ta' spiss u sajjar sakemm l-istokk ikun inxtorob kważi kollu. Żid daqs żewġ kuċċaruni stokk oħra u kompli sajjar b'dan il-mod, dejjem iżżid iktar stokk meta jkun kwazi nixef. M'hemmx għalfejn tħawwad kontinwament imma huwa importanti li tħawwad ta' spiss.
- Wara xi 10 minuti, żid l-asparagu u kompli ħawwad u żid l-istokk skont il-bżonn għal madwar 10 jew 15-il minuta oħra, sakemm ir-ross ikun sar imma għadu al dente.
- Żid daqs kuċċarun ieħor stokk mar-ross. Żid il-pesto u l-ġobon u neħħi r-risotto min-nar.
- It-taħlita għandu jkollha konsistenza kremuża (jekk m'hix, żid ftit stokk). Servi immedjatament ġo platti fondi jew ċatti; l-importanti hu li r-ross ikun mifrux fil-platt, mhux munzell.
