Ħafna drabi meta niġu bżonn il-pesto nixtru dak lest, imma meta tagħmlu d-dar malajr tirrealizza d-differenza xħin ixxomm ir-riħa li taqsamlek qalbek tal-pesto frisk. Din ir-riċetta hija tal-pesto Genovese, miżjud bl-irkotta u t-tadam li jagħmlu z-zalza aktar kremuża.
Ingredjenti
- 400g rigatoni nru 49 Agnesi
- 10 mgħaref żejt taż-żebbuġa ekstra verġni
- 500g tadam
- 50g prinjol (pine nuts)
- 30g weraq tal-ħabaq frisk, maħsul u xxuttat
- 100g ġobon Parmiġġan
- 1 sinna tewm, maqsuma fi tnejn
- 150g irkotta
- Melħ u bżar mitħun frisk
- Aħsel it-tadam, aqsmu min-nofs u neħħilu ż-żerriegħa, imbagħad agħfsu biex toħroġ il-meraq żejjed.
- Poġġi n-nofsijiet tat-tadam fi blender flimkien mal-weraq tal-ħabaq, il-prinjol, is-sinna tewm, il-Parmiġġan u l-irkotta. Żid melħ u bżar kemm tiggosta.
- Ferra’ fuqhom iż-żejt taż-żebbuġa u ibda itħan bil-mod sakemm ikollok konsistenza kremuża li la tkun magħquda ħafna u lanqas immerrqa.
- Għalli r-rigatoni f’borma b’ħafna ilma jagħli bil-melħ.
- Saffi r-rigatoni u ħallat magħhom il-pesto. Servi fil-pront.
