Ħawn Malta għandna x-xorti tajba li nsibu diversi tipi ta' qargħa matul is-sena kollha, mhux biss f'ċertu staġuni. Għalkemm forsi għandna iktar riċetti tradizzjonali xitwin li jutilizzaw dan l-ingredjent, bħal f'sopop, stuffati u minestri, hemm bosta modi differenti kif il-qargħa tista' tintuża. Din ir-riċetta partikolari għal qargħa ħamra bit-tadam żgħir u l-pesto tan-nagħniegħ u l-ħabaq taħgtina opportunità nesperimentaw bl-użu ta' din il-frotta verament mhux tas-soltu, fejn il-konsistenza tal-qargħa ħamra ssir qisa bħal tal-għaġin, u għalhekk dan il-platt, li għandu tassew togħma tajba u jsir malajr, jista' jittiekel kemm bħala platt prinċipali kif ukoll bħala parti minn platt ieħor.
Ħin: 10 minuti
Isservi: 4 persuni
Ingredjenti:
- Kilo qargħa bagħli twil u qargħa ħamra
- 250g tadam żgħir (cherry tomatoes) maqsum min-nofs (madwar kikkra u nofs)
- 1/4 kikkra pesto (tista' tuża kemm dak magħmul mil-ħabaq biss jew inkella ħallat il-ħabaq u n-nagħniegħ), miżjud b'madwar 2-3 imgħaref ilma fietel
- Ġobon Parmeġġan (jekk trid)
- 2 imgħaref żejt taż-żebbuġa Carapelli
- Sinna tewm maħkuka
- Bżar iswed mitħun, skont il-gosti
- Melħ, skont il-gosti
Tħejjija:
- Uża vegetable peeler biex tqatta' l-qargħa f'żigarelli twal. L-ewwel qaxxar ftit minn naħa imbgħad dur għan-naħa l-oħra. Kompli sejjer hekk sakemm tasal għaż-żrieragħ. Armi l-qalba.
- Sajjar il-qargħa u t-tadam f'żewġ lottijiet billi ssaħħan imgħarfa żejt ġo taġen kbir fuq nar medju-għoli u taqli nofs ma nofs it-tewm u ftit melħ, imbgħad sajjar il-kumplament.
- Sajjar u ħawwad kull lott għal madwar 2-3 minuti sakemm il-qargħa tibda' tirtab u ssir kemm xejn trasparenti, u t-tadam jibda jitlef il-forma. Żid il-bżar iswed u iktar melħ skont il-gosti.
- Meta tkun sajjart iż-żewġ lottijiet, itfa' kollox flimkien fit-taġen u saħħan qabel ma sservi. Jekk hemm xi meraq fit-taġen, ferrgħu fuq it-taħlita fil-platti.
- Żid ftit pesto (madwar mgħarfa) f'kull platt u żid il-parmeġġan jekk tixtieq.
Informazzjoni tan-nutrizzjoni: 211 kalorija
