Il-pudina tal-ħobż hija parti mit-tradizzjoni Maltija, iżda żgur li ma teżistix riċetta waħda tipika, għax kulħadd iħejjiha skont il-gosti u t-tradizzjoni tal-familja tiegħu. Din ir-riċetta hija differenti minnhom kollha, għax fiha ftit biss ingredjenti, fosthom iċ-ċikkulata Cadbury. Din ir-riċetta hija ideali biex teħles mill-ħobż li jibqagħlek sabiex toħloq deżerta tajba kważi mix-xejn.
Preparazzjoni: 15-il minuta
Tisjir: 30 minuta
Isservi: 10
Ingredjenti:
- 10 biċċiet ħobż sliced, preferibbilment minn ħobża biż-żbib
- 150 g Cadbury Dairy Milk imkissra f'biċċiet
- 60 g butir
- 425 ml krema (whipping cream)
- 75 g caster sugar
- 3 bajdiet
- 25 g Bournville Cocoa Powder
Tħejjija:
- Dellek dixx tal-forn ta' żewġ litri bi ftit butir.
- Qatta' l-ħobż f'nofsijiet jew iżgħar skont id-daqs tad-dixx.
- Dewweb flimkien iċ-ċikkulata, il-krema, iz-zokkor u l-butir ġo banjumarija (skutella f'kazzola bil-misħun).
- Ħabbat il-bajd. Żid it-taħlita kif ukoll it-trab taċ-ċikkulata, u ħabbat.
- Ferragħ 1/3 mit-taħlita fil-qiegħ tad-dixx, irranġa l-ħobż fil-wiċċ u iksi bil-kumplament tat-taħlita.
- Għatti d-dixx bil-cling film u ħalli kollox joqgħod għal madwar siegħa jew sagħtejn sakemm il-ħobż jixrob it-taħlita taċ-ċikkulata.
- Saħħan il-forn għal 180 ⁰C, u sajjar il-ħobż għal madwar nofs siegħa, jew sakemm il-wiċċ jiġi jqarmeċ u l-ġewwieni jibqa' mxarrab u kremuż.
Għoġbitek din ir-riċetta? Niżżel il-kummenti tiegħek fl-ispazju hawn taħt.
