Read this recipe in English: Mixed appetizers platter
Platt imħallat għal qabel l-ikel jew biex jittiekel ma’ xi tazza nbid mal-ħbieb. Taħlita ta’ ħaxix u laħam kiesaħ flimkien ma’ dips tal-fażola u ħabaq u servuti bil-crackers. F’dan il-platt tista’ żżid u tibdel skont il-gosti.
Isservi: 8 persuni
Ingredjenti:
- Bukkett asparagus, imnaddaf
- 100g prosciutto, maqsum għat-tul min-nofs
- Żejt taż-żebbuġa, biex tidlek
- 100g minn kull wieħed: żebbuġ iswed; qlub tal-qaqoċċ; brunġiel mixwi, bżar aħmar (capiscum) mixwi
- Crackers biex isservi
Għad-dipp tal-ħabaq:
- 125g ġobon artab (cream cheese)
- ½ kikkra pesto tal-ħabaq
- 2 mgħaref meraq tal-lumi
Għad-dipp tal-fażola
- 400g fażola bajda tal-bott, imsaffija u mlaħalħa
- 2 mgħaref meraq tal-lumi
- 1 sinna tewm, misħuqa
- 2 mgħaref żejt taż-żebbuġa
Tħejjija:
- Biex tagħmel id-dipp tal-ħabaq: għaffeġ flimkien, b’furketta jew proċessur tal-ikel, il-ġobon il-pesto, il-meraq tal-lumi u mgħarfa ilma sakemm ikollok taħlita lixxa. Poġġi t-taħlita f’bieqja.
- Biex tagħmel id-dipp tal-fażola: għaffeġ flimkien, b’furketta jew proċessur tal-ikel, il-fażola, il-meraq tal-lumi, it-tewma u 1 ½ mgħarfa miż-żejt taż-żebbuġa sakemm ikollok taħlita lixxa. Poġġi t-taħlita f’bieqja u roxx bil-kumplament taż-żejt taż-żebbuġa.
- Gerbeb l-asparagus fil-prosciutto. Idlek grilja biż-żejt taż-żebbuġa u ixwi l-asparagus sakemm jirtab, madwr 4-6 minuti. Dawwar kultant biex isir minn kull naħa.
- Irranġa l-aspsragus bil-prosciutto, iż-żebbuġ, il-qlub tal-qaqoċċ, il-brunġiel u l-bżar aħmar fuq platt kbir. Servi mad-dips u l-crackers.
Għoġbitek din ir-riċetta? Għidilna billi tħalli l-kummenti tiegħek hawn taħt, u agħmel ir-rating tiegħek u share biex inkomplu nwasslulek aktar riċetti li jogħġbuk.
