Dan il-platt penne fih ingredjenti li niltaqgħu magħhom sikwit f’riċetti tal-għaġin, imma li kkumbinati flimkien mhumiex daqstant komuni. Is-salami u l-inċova t-tnejn għandhon togħmiet pjuttost qawwijin, imma mbagħad jintegraw mal-brokkli u l-kaboċċi li t-togħma tagħhom hija aktar dgħajfa.
Ingredjenti
Għal 4 persuni
- 400g brokkli
- 350g kaboċċi (bajda)
- 200g listi tas-salami
- 1 bżaru aħmar jaħraq
- 4 biċċiet inċova
- 2 sinniet tewm
- 350g għaġin penne
- 2 mgħaref żejt taż-żebbuġa ekstra verġni, u aktar biex isservi
- Bukket żgħir tursin frisk
- 40g ġobon Parmiġġan, maħkuk
- 80g prinjol (pine nuts), inkaljat
- 1 lumija
Metodu
- Għalli borma kbira bl-ilma bil-melħ. Sadanittant aqta’ l-brokkla fi fjuretti u qatta’ l-kaboċċa rqiq. Qatta s-salami fi strixxi ta’ 1ċm wisa’. Aqsam il-bżaru għat-tul min-nofs , neħħilu ż-żerriegħa u qattgħu rqiq. Qatta’ l-inċova u t-tewm.
- Għalli l-penne fl-ilma jagħli. Sadanittant saħħan iż-żejt f’taġen kbir fuq nar medju. Qalli s-salami, il-bżaru, l-inċova u t-tewm għal 3 minuti. Żid il-kaboċċi u ħawwad għal madwar 2 minuti, sakemm titbiel il-kaboċċa. Neħħi minn fuq in-nar.
- Tella’ l-penne b’mgħarfa mtaqqba u itfgħu fit-taġen. Fil-misħun tal-għaġin itfa’ l-brokkli u għalli għal 2 minuti. Sadanittant qatta’ t-tursin.
- B’mgħarfa mtaqqba tella’ l-brokkli mill-ilma għal ġot-taġen. Żid it-tursin, il-Parmiġġan u l-prinjol. Poġġi t-taġen fuq nar medju u ħawwad għal 2 minuti jew sakem jisħon kompletament.
- Biex isservi agħsar fuqu l-meraq tal-lumi u roxx biż-żejt taż-żebbuġa.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.
