Il-kulur aħmar huwa assoċjat mal-imħabba, man-nar, mad-demm – mad-demm ibaqbaq jaħraq nar bl-imħabba! Agħżel li tgħaxxaq lil maħbub/a tiegħek b'gallettini ħomor f'jum San Valentin; bit-taħlita red velvet, dawn il-pastini żgħar huma faċilissimi biex tagħmilhom.
Preparazzjoni:25 minuta
Ħin totali: 40 minuta
Kwantità: 18
Ingredjenti:
- 75 g butir
- 125 g zokkor ismar
- 1 bajda
- ½ kuċċarina essenza tal-vanilla
- ½ kuċċarina trab tal-ħami (baking powder)
- 175 g dqiq
- 50 ml jogurt naturali
- Mgħarfa kulur tal-ikel aħmar
- Niskata melħ
Għall-krema:
- 50 g ġobon artab (cream cheese)
- 30 g butir, temperatura tal-kamra
- ½ kuċċarina essenza tal-vanilla
- 225 g zokkor tal-ġelu (icing sugar), u ftit aktar biex troxx, mgħarbul
Tħejjija:
- Saħħan il-forn għal temperatura ta’ 180°C. Iksi żewġ tilari bil-kartaforn.
- Ħabbat flimkien il-butir u z-zokkor b’ħabbata tal-elettriku għal 2-3 minuti, sakemm ikollok taħlita ħafifa.
- Żid il-bajda u l-essenza tal-vanilla u ħabbat sakemm jitħallat kollox. Żid ukoll it-trab tal-ħami.
- Żid ftit mid-dqiq u ħabbat, imbagħad żid ftit mill-jogurt u erġa’ ħabbat. Kompli b’dan il-metodu sakemm jispiċċaw. Oqgħod attent li ma tħabbatx it-taħlita żżejjed.
- Żid il-kulur tal-ikel u niskata melħ u ħawwad sakemm it-taħlita kollha tieħu l-kulur.
- Poġġi t-taħlita f’piping bag b’ponta lixxa ta’ 1 ċm. Agħmel ċrieki ta’ madwar 2-3 ċm dijametru fuq it-tilar, ħalli spazju ta’ 3 ċm bejn waħda u oħra biex ikollhom spazju fejn jikbru.
- Aħmi għal 14-il minuta, jew sakemm jintnefħu u jitilgħu lura meta tagħfashom ftit. Ħallihom jibirdu fuq it-tilar stess għal mill-inqas 10 minuti, imbagħad poġġihom fuq gradilja biex jiksħu.
- Biex tagħmel il-krema:
- Ħabbat flimkien il-ġobon u l-butir b’ħabbata tal-elettriku.
- Żid l-essenza tal-vanilla u z-zokkor tal-ġelu.
- Ħabbat bil-mod, imbagħad żid il-veloċità sakemm ikollok taħlita lixxa u ħafifa.
- Idlek nofs il-gallettini min-naħa ċ-ċatta bil-krema u poġġi gallettina oħra fuq il-krema biex tifforma.
- Għarbel fuqhom ftit zokkor tal-ġelu qabel isservihom.
Ippruvajtha din ir-riċetta? Għoġbitek? Għidilna x'taħseb billi tħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
Would you like to read this recipe in English? Let us know in the comments section below!