Il-ġewż tal-Indi (coconuts) jidħol f’ħafna riċetti tal-ħelu. Il-ħlewwa tiegħu mat-togħma ftit qarsa tal-lumi jagħmlu lil dan il-ħelu irreżistibbli għal min jiggosta dan il-ġewż partikolari.
Ingredjenti
- 100g butir, artab
- 100g zokkor fin (caster sugar)
- 1 bajda
- 115g dqiq
- 20g ġewż tal-indi mnixxef u mfarrak (dessicated coconut)
Il-krema tal-lumi
- 50g butir, imqatta’
- 100g zokkor fin
- 1 bajda, imħabbta
- 2 kuċċarini qoxra ta’ lumija maħkuka fin
- 60ml meraq tal-lumi
Is-saff tal-wiċċ tal-ġewż tal-indi
- 2 bajdiet
- 100g zokkor fin
- 200g ġewż tal-indi mnixxef u mfarrak
- Saħħan il-forn għal temperatura ta’ 180°C. Idlek u iksi bil-karta forn dixx ta’ 19 x 29ċm. Taqtax il-karta żejda li jibqa’ ’l fuq mill-ġnub.
- Bil-magna ħabbat il-butir u z-zokkor sewwa flimkien. Żid il-bajda u ħabbat biss sakemm titħallat mal-butir u z-zokkor. Żid id-dqiq u l-ġewż tal-indi u kompli ħawwad b’mgħarfa tal-injam. Ferra’ fid-dixx ippreparat u aħmi għal 15-il minuta jew sakemm tara li ħmar il-wiċċ.
- Sadanittant ipprepara s-saff tal-lumi. F’kazzola fuq nar medju, ħallat flimkien il-butir, iz-zokkor, il-bajda, il-meraq u l-qoxra tal-lumija. Ħawwad għal 5 minuti sakemm it-taħlita tagħli u tibda tagħqad. Neħħiha minn fuq in-nar u ħalliha tibred ftit. Ifrex it-taħlita tal-lumi fuq il-qiegħ li diġà ħmejt.
- Biex tagħmel il-wiċċ tal-ġewż tal-indi, ħabbat f’bieqja l-bajd maz-zokkor b’furketta. Żid il-ġewż tal-indi u ħawwad sakemm jitħallat kollox sew. Ifrex fuq, u għatti, is-saff tal-lumi. Aħmi għal 20-25 minuta jew sakemm jiħmar il-wiċċ. Oħroġ id-dixx mill-forn u ħallih jiksaħ kompletament. Qatta’ f’biċċiet kwadri ta’ porzjon.