Kultant ikun fadlilna ikel minn ikliet oħra, xi patata u ħaxix mgħolli li tajjeb minflok narmuhom noħolqu platt ieħor bihom. Din ir-riċetta hija mibdija mill-bidu, imma jekk ikollok fdalijiet bħal dawn tista’ tużahom ukoll. Iż-żieda tal-bacon u basal jagħmlu l-palat aktar pjaċevoli u l-jogurt Grieg jagħmel il-patata u l-pastard aktar kremużi.
Ħin: siegħa u 15-il minuta
Isservi: 8 persuni
Ingredjenti:
- 6 patatiet kbar, imqaxxrin u mqattgħin dadi
- 4 kikkri (madwar 550 g) fjur tal-pastard imqatta’
- 240 ml jogurt Grieg
- 180 ml stokk tat-tiġieġ
- 4 mgħaref butir, temperatura tal-kamra
- 100 g ġobon tat-toqba, maħkuk oħxon
- 2 imgħaref żejt taż-żebbuġa
- Basla kbira, maqsuma min-nofs u mqattgħa għat-tul
- 4 listi bacon, imqattagħin strixxi
- Niskata melħ
- Bżar mitħun frisk
Metodu:
- Poġġi l-patata f’borma kbira, għattiha bl-ilma u poġġiha fuq nar għoli sakemm tiftaħ tagħli. Baxxi n-nar u tektek għal 20 minuta.
- Żid il-pastard u erġa’ ħalli l-ilma jiftaħ jagħli, ħawwad u tektek għal 6-10 minuti oħra; sakemm il-pastard jirtab.
- Saffi l-patata u l-pastard mill-ilma u erġa’ poġġihom fil-borma.
- Żid il-jogurt, il-butir, il-melħ u l-istokk. Għaffeġ kollox flimkien b’masher sakemm ikollok taħlita kważi lixxa. Żid il-ġobon tat-toqba u ħawwad sew.
- Saħħan il-forn temperatura ta’ 200°C. Idlek dixx tal-forn biż-żejt.
- Saħħan iż-żejt taż-żebbuġa f’taġen fuq nar moderat.
- Żid il-basal u qalli għal madwar 4 minuti. Żid il-bacon u bżar mitħun frisk u kompli qalli għal 4 minuti oħra jew sakemm tara li l-basal irtab u beda jieħu l-kulur.
- Ifrex it-taħlita tal-patata u pastard fid-dixx u fuqha ifrex it-taħlita tal-bacon u l-basal.
- Aħmi mikxuf għal madwar 25 minuta jew sakemm jibda jiħmar il-wiċċ.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
