Il-papra bil-larinġ hija popolari ħafna u l-favorita ta’ bosta nies. Meta ma jkollniex ħafna nies għall-ikel l-aħjar li nużaw is-sider biss, li ssib tixtri faċilment waħdu. Dan il-platt tista’ sservih ma’ ross basmati jew jasmine mgħolli, jew ma’ insalata ħadra.

Ħin: 45 minuta

Iservi: 4 persuni

Ingredjenti:

• 4 mgħaref għasel
• 150 ml meraq tal-larinġ
• Biċċa ġinġer friska ta’ madwar 2 ċm, imqaxxra u maħkuka rqiq
• 200 ml stokk tat-tiġieġ
• Kuċċarina dqiq tal-qamħirrun (corn flour)
• 2 isdra tal-papra, bil-ġilda mfella
• Mgħarfa mustarda
• Flieli tal-larinġ, biex isservi

Tħejjija:

1. Saħħan il-forn għal temperatura ta’ 200°C.
2. Biex tagħmel iz-zalza:
   1. F’kazzola poġġi 2 mgħaref mill-għasel, il-meraq tal-larinġ, l-istokk tat-tiġieġ u l-ġinġer.
   2. Ħoll id-dqiq tal-qamħirrun f’mgħarfa ilma u żidu fil-kazzola.
   3. Poġġihom fuq nar moderat u ħawwad sakemm it-taħlita tiftaħ tagħli u tibda tagħqad.
   4. Itfi n-nar u ħalli z-zalza għas-sħana.
3. Fi platt fond ħallat il-kumplament tal-għasel mal-mustarda.
4. Saħħan taġen b’qiegħ oħxon u ixwi l-isdra tal-papara fuq in-naħa tal-ġilda għal madwar 6 minuti. Tella’ l-isdra mit-taġen u billhom min-naħa n-nejja fit-taħlita ta’ għasel u mustarda. Erġa’ poġġihom fit-taġen u kompli ixwihom għal 3 minuti oħra.
5. Poġġi l-isda f’dixx u daħħalhom fil-forn għal 10-15-il minuta jew sakemm isiru għall-gosti tiegħek. Normalment il-papara tisserva ftit ħamra fin-nofs tagħha.
6. Qatta’ l-isdra tal-papra u servihom maz-zalza u l-flieli tal-larinġ.

Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.

Would you like to read this recipe in English? Let us know in the comments section below!