Il-pappardelle huwa tip t'għaġin pjuttost goff meta mqabbel ma’ għaġin ieħor. Kważi kważi tista’ tieklu bil-furketta u s-sikkina! F’20 minuta biss ikollok platt verament tajjeb b’togħmiet li jikkuntrastaw: it-togħma qarsa tal-lumi, l-ispinaċi kemxejn morra flimkien mal-lewż joħolqu palat eċċellenti mal-laħam tal-ħaruf u l-pappardelle.
Preparazzjoni: 20 minuta
Ħin totali: 30 minuta
Isservi: 4
Ingredjenti:
- 300 g għaġin pappardelle
- 350 g biċċiet tal-ħaruf mingħajr għadam (koxxa)
- 2 imgħaref żejt taż-żebbuġa
- 2 sinniet tewm, misħuqin (mgħaffġin ftit)
- 3 kuċċarini qxur tal-lumi, maħkuk irqiq
- 300 g weraq tari tal-ispinaċi
- Mgħarfa ilma
- 35 g lewż, inkaljat u mqatta’ għat-tul
- 60 ml meraq tal-lumi
- Melħ u bżar mitħun frisk
- Żejt taż-żebbuġa, biex isservi
Tħejjija:
- Għalli l-għaġin f’borma kbira ilma bil-melħ sakemm isir al dente. Saffi.
- Sadanittant idlek il-biċċiet tal-ħaruf b’mgħarfa miż-żejt u roxx bil-melħ u l-bżar. Saħħan grilja fuq nar għoli u ixwi l-ħaruf għal 2-3 minuti fuq kull naħa jew sakemm isiru għall-gosti tiegħek. Poġġi l-laħam fuq platt u għattih bil-foil.
- Saħħan mgħarfa żejt oħra f’taġen fuq nar moderat u żid it-tewm, il-qxur tal-lumi, l-ilma u l-ispinaċi. Ħawwad għal minuta jew sakemm jidbiel l-ispinaċi.
- Qatta’ l-ħaruf f’biċċiet għat-tul irqaq.
- Mal-papardelle żid il-biċċiet tal-ħaruf, it-taħlita tal-ispinaċi, il-lewż, u l-meraq tal-lumi. Roxx bil-melħ u l-bżar mitħun frisk u ħawwad.
- Servi fil-pront b’aktar żejt taż-żebbuġa fil-wiċċ.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
