Read this recipe in English: Filo parcels with salmon and leek.
Platt tajjeb li tippreparah fi ftit ħin biss. Adattat ħafna għal min fi ħsiebu jqatta’ serata romantika d-dar f’San Valentinu flimkien mas-sieħeb jew sieħba tiegħu.
Preparazzjoni: 15-il minuta
Ħin totali: 50 minuta
Isservi: 2 persuni
Ingredjenti:
- 3 kurratiet (leeks), imnaddaf u mqatta’ rqiq
- 25 g butir
- 25 g butir, imdewweb
- 100 g ġobon artab (cream cheese)
- 6 folji għaġina filo
- 2 biċċiet flett tas-salamun, mingħajr ġilda
- Melħ u bżar mitħun frisk
Tħejjija:
- Saħħan il-forn għal temperatura ta’ 180°C.
- Poġġi l-kurrat f’kazzola mal-biċċa butir u 3 mgħaref ilma.
- Għatti l-kazzola u tektek għal 10 minuti sakemm jirtab il-kurrat.
- Neħħi l-kazzola minn fuq in-nar u ħalliha tibred ftit, imbagħad żid il-ġobon, melħ u bżar u ħawwad.
- Idlek folja filo bil-butir, imbagħad poġġi tnejn oħra fuqha filwaqt li tidlek bejn kull waħda.
- Poġġi biċċa mis-salamun fin-nofs, roxx bil-melħ u l-bżar u ferra’ nofs it-taħlita tal-kurrat fuq is-salamun.
- Itwi t-truf tal-filo fuq is-salamun, iġbed il-ġnub u agħfashom flimkien biex tagħlaq.
- Irrepeti l-proċess bin-nofs l-ieħor.
- Idlek kull pakkett bil-butir, poġġihom fuq tilar midluk u aħmi għal 20-25 minuta sakemm jiħmaru.
- Servi sħun ma’ insalata ta’ ħaxix aħdar.
Ippruvajtha din ir-riċetta? Kif sibtha? Għidilna billi tħalli kumment u r-rating hawn taħt u agħfas share.
