Il-paella hija platt tradizzjonali Spanjol, li l-bażi tiegħu huwa r-ross, b'ingredjenti differenti ta' laħmijiet, frott tal-baħar u fażola. L-aktar popolari hija l-paella b'taħlita ta' laħam tat-tiġieġ u frott tal-baħar. Il-paella tradizzjonali Spanjola għandha ż-żagħfran bħala ingredjent, li jagħti kulur isfar dehbi, imma għal din ir-riċetta jista' jinqabeż u r-riżultat xorta jkun tajjeb. Ingredjent ieħor huwa l-pimenton – il-paprika.
Ħin biex tipprepara: siegħa
Ħin totali: siegħa u 15-il minuta
Ingredjenti
Għal 4 persuni
- 4 1/2 kikkri brodu tat-tiġieġ
- 1/2 kuċċarina żagħfran mitħun (jekk trid)
- 1 kuċċarina paprika ħelwa jew affumikata
- 1 mgħarfa żejt taż-żebbuġa ekstra verġni
- 4 koxox tat-tiġieġ (450g b'kollox), bil-għadam u bil-ġilda
- Melħ oħxon u bżar mitħun frisk
- 170g zalzett chorizo mnixxef, imqatta' 1/2ċm ħxuna
- 1/2 basla, imqattgħa rqiq
- 3 sinniet tewm, misħuq
- 2 tadamiet kbar, mingħajr żerriegħa u mqattgħin
- 1 1/2 kikkri ross arborio
- 225g gambli bil-qoxra, bil-vina maqlugħa
- 12-il masklu (mussels)
Metodu
- Saħħan il-forn għal temperatura ta' 175°C, bl-ixkaffa fl-aktar parti baxxa.
- F'kazzola ħallat il-brodu, iż-żagħfran (jekk se tużah) u l-paprika. Poġġihom fuq in-nar u, hekk kif jagħli, baxxi n-nar u żommu jtektek bil-mod.
- Saħħan iż-żejt fuq nar medju f'taġen kbir (30ċm) u bil-ġenb għoli, jew borma kbira u baxxa, li jidħlu fil-forn.
- Roxx it-tiġieġ bil-melħ u bżar. Meta ż-żejt ikun saħan sew itfa' t-tiġieġ, fuq in-naħa tal-ġilda, sakemm jiħmaru, 4-5 minuti.
- Dawwarhom fuq in-naħa l-oħra u tella' l-likwidu li jkun ħareġ minnhom minbarra mgħarfa waħda. Imbotta l-koxox mal-ġenb tat-taġen u żid il-chorizo. Aqli sakemm jiħmar, madwar 3 minuti.
- Żid il-basla u t-tewm u qalli sakemm jirtabu, madwar 5 minuti.
- Żid it-tadam u ħawwad sikwit għal madwar 10 minuti, sakemm it-taħlita tibda tagħqad.
- Itfa' wkoll ir-ross u ħawwad biex jinkesa kollu biz-zalza; ferra' l-brodu sħun u 1/2 kuċċarina melħ.
- Tella' l-koxox fil-wiċċ biex ir-ross ikun kollu mgħerraq. Ħalli r-ross jibda jagħli u tektek għal 8 minuti. Ħawwad kultant.
- Deffes il-maskli fil-likwidu u sajjar għal 2 minuti, imbagħad poġġi l-gambli fil-wiċċ.
- Daħħal il-paella fil-forn għal 10-12-il minuta, sakemm jinxtorob il-likwidu kollu. Ħalli l-paella toqgħod għal 10 minuti qabel isserviha.
Ippruvajt din ir-riċetta? Kif sibtha? Għidilna billi tħalli kumment hawn taħt.