Read this recipe in English: Recipe: Baked oysters
L-oysters huma magħrufin bħala wieħed mill-aktar ikel afrodiżjaku li tista’ tiekol minħabba l-ammont għoli ta’ żingu li fihom. Għandhom ukoll ammont għoli ta' vitamini u minerali essenzjali għall-ġisem bħalma huma l-proteina, ħadid, omega 3, kalċju, u vitamina B-12.
Ħin: siegħa u 10 minuti
Isservi: 4 persuni
Ingredjenti:
- 24 oyster
- Meraq ta’ lumija
- 120 ml inbid abjad (dry)
- 1 basla żgħira, imqattgħa rqiq
- 30 g butir
- 120 ml krema doppja
- 1 isfar ta’ bajda
- Bżar mitħun frisk
- 1 kg melħ oħxon, biex tqiegħed l-oysters fuqu
Tħejjija:
- Iftaħ l-oysters siegħa qabel u neħħi l-ewwel ilma li jkollhom.
- Ifrex il-melħ fuq dixx jew tilar u poġġi l-oysters fuqu b’mod li jibqgħu ċatti u ma jiċċaqalqux. Ħallihom f’post frisk imma mhux fil-friġġ.
- Saħħan il-forn għal temperatura ta’ 220°C.
- F’dan il-ħin l-oysters jerġgħu jerħu l-ilma (li ma jkunx mielaħ bħall-ewwel wieħed). Ferra’ dan l-ilma minn ġo passatur għal ġo kazzola.
- Fil-kazzola żid l-inbid, il-meraq tal-lumi, il-butir u l-basla. Poġġi l-kazzola fuq nar moderat għal għoli u għalli sakemm il-likwidu jinxtorob u jibqa’ biss daqs 2 mgħaref likwidu.
- Żid il-krema u l-bżar u neħħi l-kazzola minn fuq in-nar. Żid l-isfar tal-bajd u ħawwad.
- Poġġi l-kazzola fuq nar baxx sakemm iz-zalza tibda tagħqad. Tħallix iz-zalza tagħli.
- Neħħi xi ilma li jkun reġa’ ħareġ mill-oysters u poġġi madwar kuċċarina zalza f’kull wieħed. Aħmi fil-forn għal 10 minuti.
- Servi l-oysters fil-pront fuq sodda tal-melħ, li sservi biex jibqgħu sħan u ma jiċċaqalqux.
Ippruvajtha din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.
