Dan il-platt għaġin jagħmel ikla bnina għall-familja kollha. Il-ftiet mixwi (croutons) imdorrijin narawhom l-aktar mas-sopop, imma f’dan il-każ jagħmlu kuntrast qawwi mal-għaġin, kemm bit-togħma tat-tewm u kemm għax ibsin u jqarmċu mal-għaġin artab.
Ingredjenti
Għal 4 persuni
- 1 kuċċarina bżar aħmar niexef imfarrak
- 10 biċċiet inċova, imqattgħin; u kuċċarina żejt minn tal-inċova stess.
- ⅓ kikkra ġobon Parmiġġan, maħkuk
- Il-meraq ta’ nofs lumija
- 6 biċċiet ħobż abjad, mingħajr qoxra u mqatta’ dadi
- 2 mgħaref tewm imqatta’
- ¼ kikkra żejt taż-żebbuġa
- 3 kikkri fjuri tal-brokkli, f’biċċiet żgħar
- 300g orecchiette jew għaġin bebbux
Metodu
- Saħħan il-forn għal temperatura ta’ 180°C. Ifrex id-dadi tal-ħobż fuq tilar.
- Poġġi t-tewm u ż-żejt taż-żebbuġa fi proċessur tal-ikel u itħanhom sew.
- B’pinzell idlek il-ħobż b’nofs l-ammont taż-żejt bit-tewm. Daħħal it-tilar fil-forn u ixwi l-ħobż għal 10 minuti. Qallbu kull ftit minuti biex jinxtewa ugwalment.
- Għalli l-għaġin f’borma kbira ilma jagħli bil-melħ.
- Sadanittant imla ⅔ ta’ kazzola bl-ilma, żid niskata melħ u poġġiha fuq in-nar. Xħin tiftaħ tagħli itfa’ l-brokkli; erġa’ ħalli l-ilma jibda jagħli, stenna 30 sekonda u saffi l-brokkli mill-ilma.
- Saħħan taġen kbir fuq nar medju u żid il-kumplament taż-żejt bit-tewm. Baxxi n-nar u qalli għal 2 minuti. Żid l-inċova, iż-żejt tal-inċova, u l-bżar aħmar. Ħawwad u kompli tektek għal 2 minuti oħra. Żid il-brokkli u ħawwad sakemm jinkesa bit-taħlita. Żid l-għagin u ħallat kollox flimkien. Servi bil-Parmiġġan u meraq tal-lumi.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.
