Riċetta: Mulled wine – xarba tal-inbid sħun imħawwar

Recipe: Mulled wine Riċetta: Mulled wine – xarba tal-inbid sħun imħawwar

Din hija xarba festiva popolari u faċli biex tipprepara. Jekk tixtieq tuża ħwawar favoriti tiegħek tista’ żżid jew tibdel ma’ dawn tar-riċetta.

Fl-ewwel parti tar-riċetta l-ħwawar jitħalltu maz-zokkor, iċ-ċitru u ammont żgħir ta’ nbid biex isir ix-xropp biex jamalgamaw aktar it-togħmiet .Dan huwa l-bażi tax-xarba. Il-kumplament tal-inbid jinżied wara biex ma jevaporax il-kontenut alkoħoliku tiegħu bis-sħana.

 

Ingredjenti

  • 2 klementini (clementines)
  • 1 lumija
  • 1 lumiċell (lime)
  • 200g zokkor fin (caster sugar)
  • 6 imsiemer tal-qronfol
  • 1 bastun tal-kannella (cinnamon stick)
  • 3 werqiet tar-rand
  • Noċemuskata sħiħa, biex tħokk
  • 2 ħlewwa stellata (star anise)
  • 2 fliexken inbid aħmar tajjeb

 

Metodu

  1. Qaxxar irqiq biċċiet kbar mill-qoxra tal-klementin, il-lumija u l-lumiċell. Poġġi z-zokkor f’kazzola kbira flimkien mal-qxur u agħsar il-meraq tal-klementin. Żid l-imsiemer tal-qronfol, il-bastun tal-kannella, il-weraq tar-rand u ftit noċemuskata maħkuka. Żid biżżejjed inbid biex tgħatti l-ingredjenti.
  2. Poġġi l-kazzola fuq nar baxx sakemm jinħall iz-zokkor kollu, imbagħad għolli n-nar għal medju sakemm it-taħlita tiftaħ tagħli. Ħalliha tagħli għal 4-5 minuti, jew sakemm it-taħlita tibda tagħqad fi xropp.
  3. Baxxi n-nar u żid il-kumplament tal-inbid u l-ħlewwa stellata (star anise). Saħħan bil-mod mingħajr ma tgħalli. Ħalli l-inbid sħun joqgħod għal 5 minuti, imbagħad servih fit-tazzi.

 

Ippruvajt din ir-riċetta?  Kif sibtha? Għidilna billi tħalli kumment jew ir-rating hawn taħt u agħfas share.