Għal ħdejn il-baħar jew xi picnic, jew bħala ikla ħafifa, dawn il-muffins b’togħma ta’ pizza għandhom jintgħoġbu kemm mit-tfal kif ukoll mill-kbar.

Ħin: 45 minuta

Kwantità: 12-16

Ingredjenti:

• 300 g dqiq self-raising
• 80 g butir, imdewweb
• Bajda
• 150 ml yoghurt naturali
• 150 ml ħalib
• Kuċċarina origanu mnixxef
• 150 g ġobon cheddar, jew ġobon ieħor simili, maħkuk
• 150 g perzut, imqatta’ dadi żgħar
• 100 g tadam imqadded, imqatta’ rqiq
• 4 basliet żgħar ħodor (spring onions) imqattgħin irqiq; jew basla mqatta’ rqiq ħafna
• bżar mitħun frisk

Tħejjija:

1. saħħan il-forn għal temperatura ta’ 200°C. idlek sewwa landa tal-muffins bil-butir, jew iksi bil-forom tal-karti.
2. Fi skutella ħabbat flimkien il-bajda, il-butir imdewweb, il-yoghurt, il-ħalib, l-origanu u bżar. Għarbel id-dqiq fuq it-taħlita likwida u ħallathom. Żid ⅔ tal-ġobon, il-perzut, it-tadam u l-basal u ħawwad sakemm jitħalltu biss.
3. B’mgħarfa imla l-forom fil-landa u roxx il-kumplament tal-ġobon fil-wiċċ.
4. Aħmi għal madwar 20 minuta jew sakemm il-muffins jagħqdu u jiħmaru. Ħallihom jibirdu għal 5 minuti fil-landa, imbagħad oħroġhom biex jibirdu fuq gradilja.
5. Servi sħan jew kisħin.

Ippruvajtha din ir-ricetta tal-muffins? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!