Din il-marmellata differenti tista’ tittiekel mal-ħobż mixwi bħala kolazzjon, imdellka fuq il-crackers bħala ikla ħafifa, jew imsaħħna fuq xi pudina bħala deżerta.
Ingredjenti
Għal 8 kikkri
- 4 larinġiet, mingħajr żerriegħa u mqattgħin irqiq
- 2½ kikkri karrotti maħkukin oħxon
- Meraq ta’ lumija
- 8 kikkri zokkor abjad
- 2 mgħaref whisky
Metodu
- Poġġi l-larinġ f’bieqja kbira u għatti bl-ilma kiesaħ. Ħallih għal matul il-lejl.
- Ferra’ l-larinġ u l-ilma f’kazzola kbira u għalli. Baxxi n-nar u tektek għal 35 minuta jew sakemm jirtab il-larinġ.
- Żid il-karrotti u l-meraq tal-lumi u erġa’ ħalli t-taħlita tiftaħ tagħli. Żid iz-zokkor u ħawwad sakemm jinħall. Tektek għal 30 minuta. Il-marmellata tkun lesta meta ttella’ mgħarfa minnha fuq platt u, meta timbotta b’subgħajk, tkun għaqdet.
- Żid il-whisky u ħawwad.
- Poġġi l-marmellata f’vażetti sterilizzati (poġġi l-vażetti nodfa vojta f’forn jaħraq jew ilma jagħli għal 10 minuti) u ssiġillahom sew.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.
