Aħna l-Maltin inħobbu nsajru l-majjal il-forn u bosta familji jieklu din l-ikla ta' spiss, anke darba fil-ġimgħa. Dak li hu tradizzjonali huwa sabiħ, iżda sabiħ ukoll tipprova r-riċetti li tant imdorri bihom imma b'verżjoni daqsxejn differenti. Mela pprova din ir-riċetta tal-majjal il-forn bil-basal u l-lumi stil Kuban u ara x'jidhirlek.
Isservi: 4-6 persuni
Preparazzjoni: 10 minuti
Ħin totali: Sagħtejn u 20 minuta
Ingredjenti:
- 3 imgħaref żejt taż-żebbuġa
- Basla kbira, mqattgħa
- Tewma sħiħa, is-snien mqaxxrin u mqattgħin irqaq
- Kikkra u 1/4 meraq frisk tal-larinġ
- 1/3 ta' kikkra meraq frisk tal-lime
- Melħ oħxon u bżar iswed mitħun
- 1/4 ta' kikkra weraq tal-origanu frisk, imqatta' rqiq
- Spalla tal-majjal (madwar kilo u nofs jew ftit iktar), bla xaħam
Tħejjija:
- Saħħan il-forn għal 230 °C. Qis li jkollok xkaffa fit-terz t'isfel tal-forn.
- Ġo taġen kbir, saħħan iż-żejt fuq nar medju-għoli. Żid il-basal u t-tewm u sajjar għal madwar 4 minuti sakemm il-basal jirtab. Ħawwad kultant.
- Żid il-meraq tal-larinġ u l-lime u sajjar sakemm jagħli. Żid il-bżar, il-melħ u l-origanu, ħawwad u neħħi min-nar.
- Nixxef il-majjal bil-karta tal-kċina. Raxxax ħafna bżar u melħ fuq il-majjal u poġġi ġo dixx bil-qiegħ fond u bl-għatu (casserole).
- Ferragħ t-taħlita tal-basal fuq u madwar il-majjal, għalaq il-casserole, u sajjar fil-forn għal madwar nofs siegħa.
- Neħħi l-casserole minn ġol-forn u naqqas it-temperatura għal madwar 175 °C. Bil-kuċċarun xarrab il-majjal bis-sugu.
- Erġa' sajjar, mingħajr għatu, għal madwar siegħa u nofs jew sakemm il-majjal ikun sar (jekk għandek termometru, għandu jilħaq madwar it-68 °C fl-iktar parti ħoxna tal-majjal). Ibqa' xarrab il-majjal bis-sugu u l-basal kull nofs siegħa.
- Oħroġ il-majjal mill-forn u ħallih joqgħod għal madwar 15-il minuta qabel ma tqatta'.
- Neħħi x-xaħam minn mas-sugu u servi l-majjal bi ftit sugu fuqu.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.