Min għandu xi siġra tal-lumi d-dar jaf il-kwantità ta’ frott li jkollha bħal dan iż-żmien, għalhekk tajjeb li nużaw minnu kemm nistgħu f’ikel u ħelu. Din ir-riċetta hija tal-limoncello, xarba alkoħolika li t-Taljani jħobbu jixorbu wara xi ikla tajba.
Preparazzjoni: 30 minuta
Ħin totali: 50 minuta; u tliet ġimgħat żmien biex tiżviluppa t-togħma
Kwantità: 2.5 lt
Ingredjenti:
- 8 lumijiet friski (mingħajr xema’)
- 1 lt vodka
- 725 g zokkor fin (caster sugar)
- 1.25 lt ilma
Tħejjija:
- Aħsel il-lumi sew u xxuttah. Qaxxru b’vegetable peeler, imbagħad neħħi l-abjad tal-qoxra b’sikkina.
- Aqsam il-qxur bejn żewġ vażetti kbar ta’ litru (sterilizzati). Imliehom bil-vodka, agħlaqhom u ħallihom hekk għal ġimagħtejn biex tiżviluppa t-togħma.
- Poġġi z-zokkor u l-ilma f’kazzola kbira u saħħanhom fuq nar moderat sakemm jinħall iz-zokkor. Għolli n-nar sakemm it-taħlita tiftaħ tagħli, erġa’ baxxi n-nar u ħalli t-taħlita tagħli għal 10 minuti mingħajr ma tħawwadha. Neħħi l-kazzola minn fuq in-nar u ħalli x-xropp jibred.
- Żid il-vodka bil-qxur max-xropp u qasam it-taħlita fi 3 vażetti kbar ta’ litru (sterilizzati). Agħlaqhom sew u poġġihom f’post frisk fid-dlam għal ġimgħa.
- Għaddi minn passatur irqiq, armi l-qxur u aqsam il-limoncello bejn 3 fliexken ta’ litru (sterilizzati) li jingħalqu sew.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
