Read this recipe in English: Recipe: Lebkuchen – German-style Christmas biscuits
Dawn il-gallettini tradizzjonali mill-Ġermanja fihom kwantità ta’ ħwawar u waqt li jkunu jinħmew jaqsmulek qabek bir-riħa tfuħ li jagħmlu. Huma verament faċli biex tagħmilhom u, bi ftit superviżjoni mill-kbar, jistgħu jagħmluhom it-tfal ukoll biex jagħtuhom bħala rigal jew idendluhom mas-siġra tal-Milied.
Ingredjenti
Għal 35 gallettina
- 50g butir
- 60g zokkor ismar
- 60ml għasel iswed (treacle)
- 1 bajda
- 265g dqiq
- ¼ kuċċarina trab tal-ħami (baking powder)
- 1 kuċċarina ġinġer mitħun
- 1 kuċċarina trab tal-kannella (cinnamon)
- ½ kuċċarina msiemer tal-qronfol mitħunin (ground cloves)
- ½ kuċċarina noċemuskata mitħuna (ground nutmeg)
- 1 abjad ta’ bajda
- 230g zokkor tal-ġelu (icing sugar)
Metodu
- Poġġi l-butir, iz-zokkor u l-għasel f’kazzola żgħira u saħħan fuq nar baxx. Ħawwad għal 2-3 minuti sakemm jinħallu l-butir u z-zokkor. Neħħi minn fuq in-nar u berred għal 10 minuti. Ferra’ t-taħlita f’bieqja.
- Żid il-bajda u ħawwad sew biex iddaħħalha fit-taħlita. Għarbel id-dqiq, trab tal-ħami, ġinġer, trab tal-kannella, imsiemer tal-qronfol u noċemuskata. Ħawwad sakemm jitħallat kollox sew flimkien. Roxx il-wiċċ li qed taħdem fuqu bid-dqiq u aqleb it-taħlita fuqu. Agħġen sakemm ikollok għaġina lixxa. Ifforma l-għaġina f’ballun ċatt u geżwirha fil-cling film. Poġġiha fil-friġġ għal siegħa biex tistrieħ.
- Saħħan il-forn għal temperatura ta’ 180°C. Iksi 2 tilari bil-kartaforn. Aqsam l-għaġina fi tnejn u iftaħ porzjon minnhom għal ħxuna ta’ 5mm. Uża forom tal-Milied – stilla, siġra tal-Milied, eċċ. – biex taqta’ l-gallettini. L-għaġina li jibqagħlek erġa’ agħġinha, ħalliha għal ftit ħin fil-friġġ, iftaħha u aqta’ l-gallettini sakemm tuża l-għaġina kollha. Poġġi fuq it-tilari ppreparati u aħmi għal 5-7 minuti jew sakemm jieħdu l-kulur. Meta toħroġ il-gallettini mill-forn ħallihom għal 5 minuti fuq it-tilar, imbagħad poġġihom fuq gradilja biex ikomplu jibirdu.
- Poġġi l-abjad tal-bajd f’bieqja. Ħabbat sakemm jitla’ xkuma. Għarbel iz-zokkor tal-ġelu fuqu u ħawwad sakemm ikollok taħlita lixxa. Itfa’ l-ġelu f’piping bag b’ponta sempliċi u żejjen il-gallettini.
Nota: jekk trid li dawn il-gallettini ddendilhom mas-siġra tal-Milied, kif toħroġhom mill-forn taqqab toqba fin-naħa ta’ fuq bi stikka. Meta jkunu lesti u mżejnin, daħħal żigarella jew spaga mit-toqba u dendilhom mas-siġra.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.