Read in English: Recipe: Lasagna with zucchini instead of pasta
Għal min irid inaqqas mill-karboidrati u jżid l-ammont ta’ ħaxix li jiekol din ir-riċetta hija adattata ferm. Minflok il-folji tal-għaġin hemm listi tal-qarabagħli.
Ħin: siegħa u 45 minuta
Isservi: 6 persuni
Ingredjenti:
- 1 kg qarabagħli mit-twil, imqatta’ listi rqaq għat-tul
- 700 g polpa tat-tadam
- Mgħarfa kunserva
- Mgħarfa żejt taż-żebbuġa
- 800 g kkapuljat t taċ-ċanga
- 300 g faqqiegħ, imqatta’
- Basla, imqattgħa
- 4 sinniet tewm, imqattgħin
- 2 mgħaref ħabaq frisk, imqatta’
- Mgħarfa Worchestershire sauce
- 400 g mozzarella, maħkuka oħxon
- 100 g ġobon Parmiġġan, maħkuk
- 500 g rkotta
- Bajda, imħabbta ħafif
- 2 mgħaref tursin frisk, imqatta’
- Niskata noċemuskata, maħkuka
- Melħ u bżar mitħun frisk
Tħejjija:
- Saħħan mgħarfa żejt f’kazzola wiesgħa fuq nar moderat u żid il-basla u t-tewm, u qallihom sakemm jirtabu. Żid l-ikkapuljat u ħawwad sakemm jieħu l-kulur, imbagħad żid il-faqqiegħ. Kif jitbiel il-faqqiegħ żid il-kunserva, il-polpa tat-tadam u l-Worchestershire sauce, melħ u bżar. Kif iz-zalza tiftaħ tagħli, baxxi n-nar, għatti l-kazzola parzjalment u tektek għal madwar 40 minuta sakemm tara li z-zalza nġibdet u bdiet tagħqad. Itfi n-nar, żid il-ħabaq u ħawwad.
- Sadanittant idlek grilja bi ftit żejt u ixwi l-qarabagħli ħafif miż-żewġ naħat u poġġihom fuq karti tal-kċina.
- Fi skutella ħabbat flimkien l-irkotta, il-bajda, ¾ mill-mozzarella u nofs il-Parmiġġan, in-noċemuskata u t-tursin.
- Saħħan il-forn għal temperatura ta’ 200°C. Idlek dixx ta’ 23 ċm x 40 ċm jew ekwivalenti bi ftit żejt.
- Poġġi ⅓ tal-qarabagħli ħdejn xulxin fil-qiegħ tad-dixx u ifrex fuqu nofs iz-zalza. Ifrex nofs it-taħlita tal-irkotta, u erġa’ poġġi ⅓ ieħor mill-qarabagħli; imbagħad il-kumplament taz-zalza u fl-aħħar il-kumplament tat-taħlita tal-irkotta. Fil-wiċċ poġġi l-aħħar saff tal-qarabagħli u roxx bil-mozzarella u l-Parmiġġan li jkun fadal.
- Aħmi għal 40-50 minuta sakemm jiħmar il-wiċċ. Ħalli l-lażanja toqgħod fil-forn għal 15-il minuta qabel isserviha.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
Would you like to read this recipe in English? Let us know in the comments section below!
