Il-parti ta’ fuq tas-saqajn tat-tiġieġ hija ideali għal din ir-riċetta. Jekk ma ssibx tixtri koXox waħedhom tista’ tixtri s-saqajn sħaħ, taqsamhom u tuża l-partijiet t’isfel (drumsticks) f’riċetta oħra; jew tista’ tuża 4 saqajn kbar sħaħ ukoll.
Preparazzjoni: 20 minuta
Ħin totali: siegħa
Isservi: 4 persuni
Ingredjenti:
- 8 koxox tat-tiġieġ kbar
- Basla, imqattgħa rqiq
- 3 sinniet tewm, imqattgħin irqiq
- 350 g polpa tat-tadam
- Ponn weraq tal-ħabaq frisk
- 60 g ġobon Parmiġġan, maħkuk
- 200 g faqqiegħ żgħir; jekk ikun ftit akbar aqsmu min-nofs
- 300 ml stokk tat-tiġieġ
- 500 g patata żgħira imqaxxra; jekk tkun ikbar aqsamha fi tnejn jew f’erbgħa, skont id-daqs
- 2 imgħaref żejt taż-żebbuġa
- Melħ u bżar mitħun frisk
Tħejjija:
- Saħħan il-forn għal temperatura ta’ 180°C.
- Saħħan iż-żejt taż-żebbuġa f’taġen kbir fuq nar moderat. Poġġi l-koxox tat-tiġieġ u ħammarhom miż-żewġ naħat. Neħħihom mit-taġen u poġġihom f’dixx tal-forn.
- Fl-istess taġen qalli l-basla u t-tewm sakemm jirtabu. Żid il-faqqiegħ u kompli qalli għal 3 minuti oħra.
- Żid il-polpa tat-tadam u, meta z-zalza tiftaħ tagħli, baxxi n-nar u tektek għal 10 minuti.
- Żid l-istokk tat-tiġieġ u l-ħabaq, u kif tisħon it-taħlita ifrixha fuq il-koxox tat-tiġieġ fid-dixx.
- Fil-wiċċ roxx il-ġobon Parmiġġan u aħmi għal 40 minuta.
- Sadanittant, għalli l-patata f’borma ilma bil-melħ sakemm tirtab imma ma titfarrakx. Saffi l-patata u poġġiha fuq il-platti.
- Poġġi l-koxox tat-tiġieġ fuq il-patata biz-zalza tat-tadam fuq kollox.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
