Din l-ikla tieħu biss 25 minuta biex tipprepara u 50 minuta fil-forn, għalhekk hija adattata wkoll għal matul il-ġimgħa meta tkun issikkata bil-ħin.
Preparazzjoni: 25 minuta
Ħin totali: siegħa u 15-il minuta
Iservi 4 persuni
Ingrdjenti:
- 8 koxox tat-tiġieġ mingħajr ġilda; tista’ wkoll tuża 4 saqajn maqsumin (madwar 600-700 g)
- 4 imgħaref żejt taż-żebbuġa
- 150 ml inbid abjad (dry)
- 500 g patata, maħsula sew u mqattgħa f’biċċiet ta’ gidma
- 3 basliet ħomor, imqattgħin flieli
- 4 sinniet tewm, imqattgħin
- 120 ml stokk tat-tiġieġ
- Mgħarfa weraq tal-klin (rosemary) frisk, imqatta’
- Niskata melħ oħxon
- Bżar mitħun frisk
Tħejjija:
- Saħħan il-forn għal temperatura ta’ 200°C.
- Saħħan 2 imgħaref miż-żejt f’taġen fuq nar moderat u sajjar it-tiġieġ minn kull naħa sakemm jieħdu l-kulur. Poġġihom f’dixx tal-forn.
- Żid il-kumplament taż-żejt fit-taġen u żid il-patata. Aqliha għal madwar 5 minuti filwaqt li ddawwarha sikwit. B’mgħarfa mtaqqba tella’ l-patata mit-taġen u poġġiha fid-dixx ukoll.
- Fl-istess taġen qalli l-basal għal 3 minuti, imbagħad żid il-weraq tal-klin,it-tewm, il-melħ u bżar, u kompli qalli għal 2 minuti oħra. Ferra’ l-inbid u l-istokk fit-taġen ukoll u kif jibdew jagħlu aqleb it-taħlita fuq il-patata u t-tiġieġ fid-dixx.
- Aħmi għal 20 minuta. Dawwar l-ingredjenti fid-dixx u kompli aħmi għal 30 minuta oħra.
- Servi ma’ ħaxix aħdar mgħolli.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!