Ritratt: Flickr/ Simon
F’siegħa biss jista’ jkollok ikla kompluta bil-kontorn ukoll jekk tipprova din ir-riċetta faċli immens.
Ħin: siegħa
Isservi: 4 persuni
Ingredjenti:
- 8 koxox tat-tiġieġ
- Mgħarfa meraq tal-lumi
- 2 mgħaref għasel
- Kuċċarina klin (rosemary)
- 150 g quinoa
- 2 mgħaref żejt taż-żebbuġa
- Basla, imqattgħa rqiq
- 2 sinniet tewm, imattgħin
- Bżaru aħmar ħelu (capiscum), imnaddaf u mqatta’
- Bżaru isfar ħelu (capiscum), imnaddaf u mqatta’
- 2 mgħaref tursin frisk, imqatta’
Tħejjija:
- Saħħan il-forn għal temperatura ta’ 200°C.
- Poġġi l-koxox tat-tiġieġ f’dixx. Fi skutella ħallat il-meraq tal-lumi, l-għasel u l-klin, u idlek il-koxox bit-taħlita. Ixwi għal 40-45 minuta, jew sakemm il-koxox isiru sew u jiħmaru.
- Sadanittant, laħlaħ il-quinoa bl-ilma kiesaħ, saffiha sew, u poġġiha f’kazzola ma’ 400 ml ilma fuq nar moderat sakemm tagħli. Għatti l-kazzola u tektek għal 15-20 minuta sakemm jinxtorob il-likwidu kollu.
- Saħħan iż-żejt f’taġen u qalli l-basla, it-tewm u l-bżar aħmar u isfar sakemm jaqbdu jirtabu. Żid il-quinoa, melħ u bżar, u t-tursin, u ħawwad kollox.
- Servi l-koxox fuq sodda tal-quinoa.
Ippruvajtha din ir-ricetta ta' koxox tat-tiġieġ bl-għasel ma’ insalata tal-quinoa? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
