Il-lemongrass tixbah ħafna l-basla twila friska fid-dehra, għalkemm it-togħma hija differenti għal kollox għax tqarreb ħafna lejn it-togħma tal-lumi. Jekk ma ssibhiex friska tista’ tuża lemongrass imnixxef (mgħarfa lemongrass imnixxef għal kull zokk frisk), u tista’ tuża wkoll il-qoxra maħkuka ta’ lumija. Ovvjament, differenza fil-palat se jkun hemm ukoll. Il-lemongrass hija ħaxixa mill-Indja li tintuża ħafna fi platti Tajlandiżi u Vjetnamiżi u tagħti lill-ikel togħma u riħa partikulari.
Ingredjenti
Għal 8-10 porzjonijiet
- 200g ross Tilda Pure Basmati
- 1 litru ħalib
- 100-125g zokkor fin (caster sugar)
- 2 izkuk lemongrass, maqsumin għat-tul
- 300ml krema doppja
- 6 bajdiet, l-isfra separati mill-abjad
Għall-wiċċ
- 500ml crème fraiche
- Qoxra maħkuka ta’ lumija
- ½ kuċċarina essenza tal-vanilla
- Zokkor fin, għat-togħma
- Frott frisk jew konfettura tal-frott (candied fruit), imħallat
- Għalli r-ross fl-ilma jbaqbaq għal żewġ minuti u saffih. Erġa’ itfgħu fil-kazzola mal-ħalib, zokkor u l-lemongrass.
- Għalli t-taħlita u tektek sakemm jinxtorob il-ħalib u jirtab ir-ross, madwar 20 minuta. It-taħlita trid tkun kremuża u mhux xotta żżejjed. Berred, neħħi l-lemongrass, u żid il-krema u l-isfra tal-bajd. Ħawwad sew.
- Sadanittant saħħan il-forn għal temperatura ta’ 150°C, iksi bil-karta forn landa ta’ 25ċm u idlikha bi ftit butir imdewweb.
- Ħabbat l-abjad tal-bajd sakemm jitla’ xkuma u daħħlu billi ‘titwih’ fit-taħlita tar-ross. B’mgħarfa kbira itfa’ t-taħlita fil-landa ppreparata u aħmi għal 50-60 minuta, sakemm tara li l-wiċċ ħmar u n-nofs issoda. Ħallih jibred fil-landa, imbagħad kessħu.
- Għat-taħlita tal-wiċċ, ħabbat il-crème fraiche mal-qoxra maħkuka tal-lumija, iz-zokkor u l-vanilla. Aqleb il-kejk minn ġol-landa u iksih bil-krema. Żejjen il-wiċċ bil-frott.
Ippruvajt din ir-riċetta? Kif sibtha? Għidilna billi tħalli kumment hawn taħt.
