Issa li fis-suq insibu ħafna qara’ aħmar, nistgħu nixtru u niffriżaw għal meta jkollna bżonn. Jien insib li l-qara’ aħmar jiffriża tajjeb ħafna u kulma trid tagħmel hu li tnaddfu miż-żerriegħa u l-ħjut tan-nofs, tqaxxru, tqattgħu dadi u tpoġġih f’boroż fil-friża.
Ingredjenti
- 200g dqiq self raising
- ½ kuċċarina melħ
- 1 kuċċarina trab tal-ħami (baking powder)
- 2 kuċċarini ġinġer mitħun
- 1½ kuċċarina trab tal-kannella
- ¼ kuċċarina noċemuskata mitħuna
- 250g purè tal-qara’ aħmar
- 110g butir, imdewwweb
- 175g zokkor ismar
- 120ml għasel
- 2 bajdiet, imħabbta
- 3 mgħaref ilma
Ibda biex tagħmel il-purè tal-qara’ aħmar. Qatta’ l-qara’aħmar f’dadi żgħar, poġġihom f’kazzola b-2ċm ilma u għallihom sakemm jirtabu. Saffi mill-ilma u ħalli l-qara’ joqtor f’passatur sakemm jibred. Għaffeġ b’furketta.
Saħħan il-forn għal-temperatura ta’ 180°C. Idlek landa (loaf tin) bil-butir u iksi l-qigħ tagħha bil-karta tal-forn.
F’bieqja ħabbart flimkien id-dqiq, it-trab tal-ħami, il-melħ, il-ġinġer, it-trab tal-kannella u n-noċemuskata. F’bieqja kbira ħabbat flimkiea,b’mgħarfa tal-injam, il-butir maħlul, il-bajd, l-ilma, il-purè tal-qara’ aħmar, l-għasel u ż-żokkor. Imbagħad ħallat it-taħlita xotta ma’ dik likwida sakemm isiru taħlita waħda.
Ferra’ t-taħlita fil-landa ppreparata u aħmi għal50-60 minuta, jew sakemm tara li stikka tal-bambù toħroġ nadifa. Oħroġ mill-forn u ħalli l-kejk jibred għal 10 minuti. Dawwar sikkina mat-tarf tal-kejk u aqilbu fuq gradilja biex ikompli jibred. Mal-ħin it-togħma ta’ dan il-kejk timmatura.
