Riċetta: Kejk tal-marmellata b’wiċċ tal-ġewż tal-Indi (coconut)

Marmalade cake with coconut topping

Kejk li jista’ jisserva kemm sħun u kemm kiesaħ, ħin it-te u kafè jew bħala deżerta, akkumpanjat bil-krema mħabbta jew ġelat tal-vanilla.

Ħin: siegħa u 5 minuti

Isservi: 12-il porzjon

Ingredjenti:

Għall-kejk:

  • 225 g dqiq self-raising, mgħarbul
  • 125 g butir
  • 175 g zokkor fin (caster sugar)
  • 2 bajdiet, imħabbtin ħafif
  • 4 mgħaref marmalade
  • 60 ml yoghurt naturali

Għat-taħlita tal-wiċċ:

  • 100 g zokkor ismar
  • 60 g dqiq plain, mgħarbul
  • 50 g ġewż tal-Indi mnixxef (dessicated coconut)
  • 90 g butir

Tħejjija:

  1. Saħħan il-forn għal temperatura ta’ 180°C. Idlek landa tonda ta’ 20 ċm dijametru bi ftit butir imdewweb u iksi l-qiegħ bil-kartaforn.
  2. Dewweb il-butir f’kazzola fuq nar bati u żid iz-zokkor. Ħawwadhom sakemm jinħall iz-zokkor kollu. Neħħi l-kazzola minn fuq in-nar u ħalliha tibred ftit.
  3. Fi skutella ħabbat flimkien il-bajd, il-yoghurt u l-marmalade.
  4. Poġġi d-dqiq fi skutella oħra u agħmel ħofra fin-nofs.
  5. Ferra’ t-taħlita tal-bajd u t-taħlita tal-butir fid-dqiq u ħawwad b’mgħarfa tal-injam sakemm jitħallat kollox.
  6. Ferra’ t-taħlita tal-kejk fil-landa ppreparata u llixxa l-wiċċ.
  7. Biex tagħmel it-taħlita tal-wiċċ:
    1. Fi skutella ħallat iż-żokkor, id-dqiq u l-ġewż tal-Indi.
    2. Żid il-butir u daħħlu fit-taħlita xotta bil-ponot ta’ subgħajk (rub in).
    3. Ferrex din it-taħlita fuq il-wiċċ tat-taħlita tal-kejk fil-landa.
  8. Aħmi għal 40-45 minuta jew sakemm stikka li ddaħħal f’nofs il-kejk toħroġ nadifa.
  9. Ħalli l-kejk jibred fil-landa għal 10 minuti, imbagħad oħorġu u ħallih jiksaħ fuq gradilja.

Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.

Would you like to read this recipe in English? Let us know in the comments section below!