Iva, sewwa qrajtu: Kejk tal-lumi bil-frawli u l-ħabaq! Filfatt dan il-kejk għandu xejra pjuttost Mediterranja b’ingredjenti bħal żejt taż-żebbuġa (flok butir), ħabaq u lumi.

Ħin: siegħa u 25 minuta

Issevi: 6-8 persuni

Ingredjenti:

• 180 ml żejt taż-żebbuġa
• Weraq tal-ħabaq
• L-isfar ta’ bajda
• 4 bajdiet, l-isfar u l-abjad mifrudin
• 150 g zokkor
• Qoxra maħkuka rqiqa ta’ lumija
• 2 imgħaref meraq tal-lumi
• 180 g dqiq self-raising
• Zokkor tal-ġelu (icing sugar) u krema mħabbta biex isservi

Għall-frawli fix-xropp:

• 6 werqiet kbar tal-ħabaq
• 50 g zokkor
• 450 g frawli
• Mgħarfa meraq tal-lumi

Tħejjija:

1. Poġġi ż-żejt taż-żebbuġa u  madwar 10 werqiet kbar tal-ħabaq (ħalli ftit biex iżżejjen) f’kazzola żgħira fuq nar baxx. Kif jibda jtektek neħħih minn fuq in-nar u ħallih joqgħod għal 10 minuti. Neħħi l-ħabaq u ħalli ż-żejt jiksaħ kompletament.
2. Saħħan il-forn għal temperatura ta’ 180°C. Idlek u iksi bil-kartaforn il-ġnub u l-qiegħ ta’ landa tonda ta’ 23 ċm.
3. B’ħabbata tal-elettriku ħabbat l-isfra tal-bajd ma’ 50 g miz-zokkor sakemm ikollok taħlita ħafifa u ċara fil-kulur.
4. Żid iż-żejt tal-ħabaq li jkun kesaħ, il-qoxra u meraq tal-lumi, u niskata melħ, u ħabbat sakemm jitħallat kollox.
5. B’mgħarfa daħħal id-dqiq bil-mod fit-taħlita (fold in).
6. Fi skutella nadifa ħabbat l-abjad tal-bajd sakemm jitla’ xkuma.
7. Żid il-100 g zokkor li jkun fadal, mgħarfa kull darba, u kompli ħabbat fil-bajd xkumat.
8. Żid u daħħal l-abjad tal-bajd bil-mod fit-taħlita tal-kejk bl-istess mod.
9. Aqleb it-taħlita fil-landa ppreparata u llixxa l-wiċċ.
10. Aħmi għal 40-45 minuta jew sakemm stikka li ddaħħal f’nofs il-kejk toħroġ nadifa.
11. Ħalli l-kejk jibred fil-landa għal 15-il minuta, imbagħad poġġih fuq platt.
12. Biex tagħmel il-frawli fix-xropp:
    1. Poġġi l-ħabaq, iz-zokkor, il-frawli, il-meraq tal-lumi u 60 ml ilma f’kazzola fuq nar baxx sakemm jibdew ibaqbqu.
    2. Ħallihom għal 3-4 minuti sakemm il-frawli jirtab kemm kemm.
    3. B’mgħarfa mtaqqba tella’ l-frawli mil-likwidu u armi l-ħabaq.
    4. Għolli ftit in-nar u tektek ix-xropp għal 2 minuti jew sakemm jonqos bin-nofs, imbagħad ferrgħu fuq il-frawli.
13. Żejjen il-kejk bil-frawli meta kjun għadu sħun u ferra’ fuqu x-xropp. Kompli żejjen bil-weraq tal-ħabaq frisk u għarbel ftit zokkor tal-ġelu fuq kollox.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!