Riċetta: Kejk taċ-ċikkulata bil-ġelat u ċ-ċirasa

CHocolate cake with ice cream and cherry filling

Verżjoni aktar sajfija tal-black forest gateau. Għalkemm jieħu tul ta’ ħin biex tipprepara minħabba li trid ħin biex tiffriża, tista’ tippreparah ġranet qabel ikollok bżonn isservih. Minflok ċirasa friska tista’ tuża wkoll tal-bott, u żżid ftit mil-likwidu tagħha maċ-cherry brandy qabel troxxu fuq il-kejk. Kun ċerta li ċ-ċirasa tneħħilha l-għadam kollu!

Ħin: siegħa, u ħin biex tiffriża

Isservi: 12-14-il persuna

Ingredjenti:

  • 600 g (1½ litru) ġelat tal-vanilla
  • 300 g ċirasa friska, mingħajr għadma
  • 250 butir, temperatuta tal-kamra
  • 500 g zokkor fin (caster sugar)
  • 4 bajdiet, imħabbtin ħafif
  • 250 g dqiq self-raising
  • 100 g dqiq plain
  • 100 g kawkaw
  • 250 ml ħalib
  • Grokk cherry brandy
  • 280 ml krema doppja
  • 250 g ċikkulata skura

 

Tħejjija:

  1. Ħalli l-ġelat f’temperatura tal-kamra sakemm jirtab mingħajr ma jinħall. Iksi landa bil-qiegħ jinqala’ ta’ 23 ċm bil-cling film minn ġewwa u ħalli żżejjed jaqa’ mal-ġnub. Aqleb il-ġelat fil-landa u ferrxu sakemm tiksi l-qiegħ. Deffes iċ-ċirasa ’l hemm u ’l hawn fil-ġelat u erġa’ llixxa l-wiċċ tal-ġelat. Għatti l-ġelat bil-cling fim żejjed tal-ġnub u ffriża sakemm jagħqad. Oħroġ il-ġelat imgeżwer fil-cling film mil-landa u erġa’ poġġih fil-friża. Uża l-istess landa biex taħmi l-kejk fiha.
  2. Saħħan il-forn għal temperatura ta’ 180°C. Idlek il-landa bil-butir u iksi l-qiegħ bil-kartaforn.
  3. Fi skutella għarbel flimkien id-dqiq self-raising, id-dqiq plain u l-kawkaw.
  4. B’ħabbata tal-elettriku ħabbat flimkien il-butir u z-zokkor sakemm ikollok taħlita ċara u ħafifa. Żid il-bajd waħda waħda u ma’ kull darba itfa’ wkoll mgħarfa mit-taħlita tad-dqiq. Imbagħad żid ukoll il-ħalib ftit ftit ma’ mgħarfa dqiq kull darba sakemm tuża l-ingredjenti kollha.
  5. Ferra’ t-taħlita tal-kejk fil-landa ppreparata u aħmi għal siegħa jew sakemm stikka li ddaħħal f’nofs il-kejk toħroġ nadifa. Ħalli l-kejk jibred fil-landa, imbagħad oħorġu u ħallih jibred kompletament fuq gradilja.
  6. Aqsam il-kejk min-nofs biex ikollok żewġ ċrieki. Roxx kull nofs mill-wiċċ fejn qtajt biċ-cherry brandy. Neħħi l-cling film minn maċ-ċirku tal-ġelat u poġġih l-ġelat eżatt fuq iċ-ċirku tal-qiegħ tal-kejk, imbagħad poġġi fuqu ċ-ċirku ta’ fuq u agħfas biex jeħel kollox fimkien. Geżwer il-kejk fil-cling film jew poġġih f’kontenitur u ffriżah sakemm ikollok bżonn.
  7. Qabel isservih ħoll iċ-ċikkulata banjumarija u żid il-krema doppja u ħallat sew. ħalliha z-zalza taċ-ċikkulata tibred ftit. Sadanittant oħroġ il-kejk mill-friża biex ikun aktar faċli li taqsmu. Aqsam il-kejk f’porzjonijiet u ferra’ ftit miċ-ċikkulata fuq kull porzjon. Servi fil-pront.

Ippruvajtha din ir-ricetta ta' kejk taċ-ċikkulata bil-ġelat u ċ-ċirasa? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.