Il-Maltin jaħtfu kull okkażjoni biex jiċċelebraw. Tant hu hekk li għal dawn l-aħħar snin qed niċċelebraw ukoll Jum San Patrizju (Saint Patrick’s Day), festa tradizzjonali Irlandiża. Għal din l-okkażjoni qed inwasslilkom din ir-riċetta ta’ kejk bil-Guinness – xarba tradizzjonali mill-Irlanda.
Ħin: siegħa u nofs
Isservi: 12-il persuna
Ingredjenti:
- 250 ml Guinness
- 250 g butir
- 80 g kawkaw; u aktar biex troxx
- 400 g zokkor fin (caster sugar)
- 2 bajdiet
- ½ kuċċarina essenza tal-vanilla
- 140 ml xorrox tal-butir (buttermilk); minflok tista’ tuża 100 ml jogurt naturali mħallat ma’ 40 ml ħalib
- 280 g dqiq
- 2 kuċċarini bikarbonat tas-sodju (bicarbonate of soda)
- ½ kuċċarina trab tal-ħami (baking powder)
Għall-krema:
- 50 g butir, temperatura tal-kamra
- 300 g zokkor tal-ġelu (icing sugar), mgħarbul
- 125 g ġobon artab bħal Philadelphia
Tħejjija:
- Saħħan il-forn għal temperatura ta’ 170°C. Idlek landa tonda ta’ 23 ċm u iksiha bil-kartaforn.
- Ferra l-Guinness f’kazzola, żid il-butir u saħħan bil-mod sakemm jinħall. Neħħi l-kazzola minn fuq in-nar, żid il-kawkaw u z-zokkor fin u ħawwad.
- Fi skutella ħabbat flimkien il-bajd, l-essenza tal-vanilla u x-xorrox tal-butir (jew jogurt u ħalib), imbagħad żidhom mat-taħlita fil-kazzola.
- Għarbel flimkien id-dqiq, il-kawkaw, il-bikarbonat tas-sodju u t-trab tal-ħami fi skutella. Ferra’ t-taħlita tal-kazzola bil-mod fid-dqiq filwaqt li tħabbat b’ħabbata tal-elettriku sakemm jitħalltu kompletament.
- Ferra’ t-taħlita tal-kejk fil-landa ppreparata u aħmi għal 45 minuta jew sakemm stikka li ddaħħal f’nofs il-kejk toħroġ nadifa. Ħalli l-kejk jibred għal kwarta fil-landa, imbagħad oħorġu fuq gradilja biex jibred sew qabel tiksih bil-krema.
- Sadanittant, b’ħabbata tal-elettriku ħabbat bil-mod flimkien il-butir u z-zokkor tal-ġelu sakemm ikollok taħlita lixxa mingħajr boċċi. Żid il-ġobon artab u kompli ħabbat bil-mod sakemm ikollok taħlita ħafifa.
- Poġġi l-kejk fuq platt u iksih kompletament bil-krema. Għarbel il-wiċċ tal-kejk bil-kawkaw.
Għoġbitek din ir-riċetta? Għidilna billi tħalli l-kummenti tiegħek hawn taħt, u agħmel ir-rating tiegħek u share biex inkomplu nwasslulek aktar riċetti li jogħġbuk.