Għandek aptit tagħmel xi ħaġa tal-ħelu malajr? Tista’ tagħmel dan il-kejk ħafif li huwa ideali biex jittiekel bħala kolazzjon jew għal ma’ xi kikkra te jew kafè. Għal dan il-kejk lanqas il-miżien m’għandek bżonn taqla’ għax tista’ tkejjel l-ingredjenti kollha li għandek bżonn bit-tazza tal-jogurt stess!

Ingredjenti

• 1 tazza (150g) jogurt naturali
• 2 tazzi zokkor
• 2 ½ tazzi dqiq
• Niskata melħ
• 3 bajdiet
• ½ tazza żejt taż-żerriegħa tal-ward tax-xemx
• Meraq ta’ nofs lumija
• 1 ½ kuċċarina trab tal-ħami (baking powder)
• Zokkor tal-ġelu (icing sugar)

Saħħan il-forn għal temperatura ta’ 160°C.

Iksi l-qigħ u l-ġnub ta’ landa tonda, b’dijametru ta’ 18-20ċm, bil-karta tal-forn u idlikha bi ftit butir maħlul.

Għarbel flimkien id-dqiq, it-trab tal-ħami u l-melħ. Ifred l-isfar tal-bajd mill-abjad u ħabbat l-abjad sakemm jitla’ xkuma. Fi skutella kbira ħabbat il-jogurt u z-zokkor, imbagħad l-isfra tal-bajd wieħed wieħed. Ma’ kull isfar li titfa’ itfa’ wkoll mgħarfa dqiq u kompli ħawwad. Żid iż-żejt u l-meraq tal-lumi u fl-aħħar id-dqiq li jkun fadal. Ferra’ t-taħlita fil-landa ppreparata u aħmi fuq l-ixkaffa tan-nofs tal-forn għal 30 minuta jew sakemm tara li stikka, jew sikkina rqiqa, imdaħħla f’nofs il-kejk toħroġ nadifa. Ħalli l-kejk jibred fil-forn stess għal 10 minuti. Għarbel lega zokkor tal-ġelu fil-wiċċ tal-kejk qabel isservih.