Il-ħarruba dejjem tibqa' frotta li hi marbuta sew ma' Malta u l-Mediterran. F'din ir-riċetta nuża ġulepp kummerċjali għax għalkemm tista' tagħmlu d-dar fih ħafna xogħol. Il-biċċa l-kbira tal-ġulepp li jinstab fis-suq hawn Malta huwa ppreparat skont riċetti antiki tal-familji li jagħmlu l-ħelu tradizzjonali kummerċjali.
Għal dan il-kejk għandek bżonn:
200 g dqiq self raising
100 g butir
80 g zokkor
3 bajdiet
Nofs kuċċarina kannella
150 g ġulepp tal-ħarrub
Niskata ġinġer
Niskata vanilja
Qoxra maħkuka ta' kwart ta' lumija
Nofs kuċċarina bikarbonat
Niskata melħ
It-Tħejjija
Saħħan il-forn għal 180 °C. Idlek id-dixx tal-kejk bil-butir. Saħħan il-butir, il-ġulepp u z-zokkor f'kazzola flimkien mal-ħwawar sakemm iz-zokkor u l-butir jinħallu. Ħallihom joqogħdu. Għarbel id-dqiq u żidu. Bil-mod il-mod żid it-taħlita tal-ġulepp, ħabbat u wara l-bajd imħabbat u l-qoxra tal-lumi. Ħawwad. Itfa' t-taħlita fid-dixx u aħmi fil-forn għal 45 minuta.
Xħin jiksaħ neħħi minn ġol-landa. Ferrex ftit zokkor mitħun minn ġo passatur fin fil-wiċċ tal-kejk.