Fis-sajf m’hemm xejn aħjar minn ikel mixwi barra. Ħafna mil-laħam li nixwu nimmarinawh kemm għat-togħma u kemm biex jixrob u ma jinxifx bin-nar qawwi. Dawn il-kebabs tat-tiġieġ huma mmarinati fil-yoghurt li jżomm il-laħam morbidu, u fil-paprika li tagħtihom togħma taħraq imma pjaċevoli, speċjalment jekk tkun paprika affumikata.
Ħin: 45 minuta, u ħin għall-immarinar
Isservi: 4-6 persuni
Ingredjenti:
- Kilo sider tat-tiġieġ, imqatta’ dadi ta’ 3 ċm
- 250 ml yoghurt naturali
- Meraq ta’ lumija
- 3 mgħaref żejt taż-żebbuġa
- Mgħarfa paprika affumikata, jew paprika normali
- ½ kuċċarina żerriegħa tal-kemmun, misħuqa
- 3 sinniet tewm, misħuqin
- Melħ u bżar mitħun frisk
- Ikollok bżonn ukoll stikek tal-kebabs imxarrbin fl-ilma għal 30 minuta
Tħejjija:
- Fi skutella kbira ħallat flimkien il-yoghurt, il-meraq tal-lumija, iż-żejt, il-paprika, il-kemmun, it-tewm, u melħ u bżar.
- Żid il-biċċiet tat-tiġieġ u dawwarhom fit-taħlita sakemm jinksew. Għatti l-iskutella u poġġiha fil-friġġ għal mill-inqas 4 sigħat.
- Domm id-dadi tat-tiġieġ fuq l-istikek. Ixwi fuq grilja midluka jew BBQ sakemm it-tiġieġ isir sew minn ġewwa.
- Servi fil-pront ma’ insalata mħallta.
