Jekk għadek ma tafx x’se ssajjar dan Ħadd il-Għid, din hi r-riċetta għalik – platt komplut ta’ xikel biċ-ċiċri u patata maxx. Riċetta ħafifa bil-kontorni b’kollox.
Ħin: sagħtejn u 20 minuta
Isservi: 4 persuni
Ingredjenti:
- Mgħarfa żejt taż-żebbuġa
- 4 ixkla tal-ħaruf
- 2 basliet kbar, maqsumin min-nofs u mqattgħin irqiq għat-tul
- 4 sinniet tewm, imqattgħin
- ½ kuċarina paprika
- 400 g polpa tat-tadam
- 200 ml stokk taċ-ċanga jew tal-ħaruf
- Bott ċiċri (400 g), imsaffija u mlaħalħa
- 80 g weraq tari tal-ispinaċi
- Melħ u bżar mitħun frisk
Għall-patata maxx:
- 600 g patata mqaxxra u mqatta biċċiet żgħar
- 30 g butir
- 250 ml ħalib
- Melħ u bżar abjad
Tħejjija:
- Saħħan il-forn għal temperatura ta’ 170°C.
- Saħħan iż-żejt f’taġen kbir fuq nar għoli u xawwat l-ixkla min-naħat kollha. Poġġihom f’dixx tal-forn.
- Baxxi n-nar għal moderat u żid il-basal, it-tewm u l-paprika; qalli għal 3 minuti sakemm jirtabu.
- Żid il-polpa tat-tadam u l-istokk u, kif jiftħu jagħlu, ferra’ kollox fuq l-ixkla fid-dixx.
- Għatti d-dixx b’għatu jew biċċa foil u aħmi għal siegħa u nofs.
- Żid iċ-ċiċri u kompli aħmi għal 30 minuta oħra.
- Oħroġ id-dixx mill-forn u żid il-weraq tal-ispinaċi u melħ u bżar. Ħawwad u ħallih joqgħod, mgħotti, għal 10 minuti.
- Sadanittant, għalli l-patata f’borma ilma bil-melħ għal 20-25 minuta jew sakemm tirtab sew il-patata.
- Saffi l-patata mill-ilma u rritornaha fil-borma. Ħawwadha għal ftit sekondi fuq nar baxx biex l-ilma li jkun fadal jevapora. Għaffeġ il-patata bil-potato masher kif tkun għadha taħraq, żid il-butir u għaffġu magħha, imbagħad żid il-ħalib, niskata melħ u bżar, u ħawwad kollox flimkien.
- Qassam il-patata maxx fuq erba’ platti u poġġi xikel fuq kull platt. Ferra’ z-zalza fuq kollox u servi.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
